Cu e palabranan aki Gobierno lo genera miyones di florin adicional na entrada via di gastonan bancario: “de vrijstellingen voor bepaalde diensten door banken en het afsluiten en uitvoeren van verzekeringsovereenkomsten komen te vervallen”. Banconan a genera 151.4 miyon florin na aña 2016 cu no ta relata na interes, esey ta significa cu un BBO di 6% lo genera 9 miyon florin adicional pa caha di Gobierno.
Esey por conclui despues di analisa e financial sector supervision report 2016 cu ta publica riba e website di Banco Central. Manera discuti ampliamente e siman aki, Gobierno lo cuminsa cobra BBO entrante 1 di juli 2018 riba tur tipo di “fees” cu banco ta genera.
E financial sector supervision report, cu Banco Central ta produci tur aña, ta inclui un resumen detaya di e entrada y gastonan di banconan comercial aki na Aruba. Eyden por lesa cu e operating income di Banco, esta e entrada bancario cu no ta relata na interes, ta casi mesun halto cu e interes cu Banconan ta genera. Den aña 2016 por ehempel, banconan a cobra 212.6 miyon florin na interes y 151.4 miyon florin na e “fees”nan bancario aki. Esaki ta significa cu e “feesnan” aki ta 41% di e entradanan total di Banco. For di e introduccion di BBO na aña 2007 Gobierno a exonera e cobramente di e impuesto aki riba entrada di banco como tambe e entrada di seguronan, sinembargo entrante prome di juli di e aña aki, esaki lo cambia. Esaki ta haci cu e 9 miyon florin adicional aki, ta adicional na e entrada adicional genera pa e aumento di e 2.5% di BBO.
Den e memorie van toelichting di e ley di “crisisheffing” Gobierno a indica cu e eliminacion di exoneracion aki lo genera 10 miyon florin extra pa aña. Esaki incluyendo e exoneracion riba e impuesto di seguro. Esey ta significa cu Gobierno ta premira cu e lo genera 1 miyon florin di e entrada di otro tipo di transaccionan financiero, manera BBO riba segurro, BBO riba money transfer, etc. Sinembargo, e mesun financial sector supervision report ta indica cu Seguronan a genera un benta di 82 miyon florin na 2016. Locual normalmente lo traduci den un entrada di casi 5 miyon florin pa aña pa Gobierno.
Tambe tin e BBO riba “bank like institutions” cu a genera un “operating income” di 21.6 miyon florin na 2016, cu tambe lo wordo afecta pa e cambio di ley aki. Den tur ta parce cu Gobierno lo genera hopi mas entrada di locual e la comunica na Parlamento. Ainda nos mesa di redaccion no a ricibi comentario di seguronan (IAA) ni di otro institucionnan financiero con nan lo wordo afecta pa e cambionan menciona.
Link na e rapport di Banco Central:
http://www.cbaruba.org/cba/readBlob.do?id=4111
