Diasabra, 7 di december, lo bay tin un bazaar riba Parkeerplaats di Instituto Coreccional KIA. Ta trata di materialnan traha door di e mesun presonan durante aña. Esaki ta tuma luga bou guia di e trahado social Brigitte Zijlstra.
E tipo di bazaarnan aki tabata luga caba den pasado. Sinembargo e ultimo dos aña y mey nada di esaki no a tuma luga. P’esey a dicidi di pone un bazaar di Pasco cu lo tuma luga diasabra mainta.
E habitantenandi KIA ta masha habil den obranan di man y asina ta bay tin na benta riba e mainta aki, stulnan, mesa y hasta BBQ Pit. Pero tambe cuadra, material di ceramica, y otro materialnan di artesania. Den KIA ta duna curso di artesania y obra man, cu ta un talento cu despues nan por uza na momento cu nan bandona KIA. E ta hopi bunita, segun sra. Zijlstra, pa mira tur loke e habitantenan di KIA por traha. Nan ta asina entusiasma cu por tene un bazaar tur luna, pero no tin suficiente trahado pa organisa esaki.
E bazaar ta tuma luga riba parkeerplaats, unda cu tin hopi tent, for di 9.30 pa 2’or di merdia.
E tipo di actividad aki ta bon pa rehabilitacion di e habitantenan di KIA. Por medio di cursonan cu ta ofrece, ta trata di yuda nan, pa ora cu nan sali eyfo nan tin un di dos chens.
