Bataya pisa pa por drenta Cocolishi

E siguiente coalicion ta mustra di lo ta 11 asiento, despues cu partidonan MEP y RAIZ a firma un acuerdo di disponibilidad cu otro. Pero awor mester yena e ministerionan y den esey dicidi si ta mantene ocho asiento, ta subie na nuebe of ta bah’e na shete of seis minister, manera cu tur hende lo spera. Specialmente den pandemia y pa duna ehempel di austeridad, ta pensa cu ta bon momento pa corta ariba prome cu bay corta den empleadonan publico y contractantnan.

E prome cinco nombernan pa bira minister pa MEP ta conoci, esta Evelyn Wever-Croes, Xiomara Maduro, Dangui Oduber, Glenbert Croes y Roco Tjon. Pero e chens ta cu esey lo ta tur cu ta minister y tin un chens cu por tuma solamente un minister mas di MEP. Pero eynan e sapato ta primi awo. Pasobra e siguiente den liña ta candidato # 6, Arthur Vallejo. Pero, e realidad ta cu Endy Croes ta # 5 den MEP si sigui e herarkia di voto. E ta poniendo presion pa e bira minister, por lo menos di deporte, cu tanto el a campaña cu ne. Pa Croes por bira minister, tanto Vallejo como Tevreden lo mester nenga e funcion. Claro, cu pa bira minister no tin e presion manera parlamentario, pero si un di nan rabia y bira independiente den parlamento, ta nifica caida di e gabinete.

Pa mas informacion y detaye completo di e proceso y historia di gabinetenan di Aruba, lesa e edicion di TREMPAN di awe.