“Pais Hulanda y Aruba a tuma nota di un caso sumario entama pa en total 6 persona di nacionalidad Venezolano cu dado momento a dicidi di pidi asilo aki na Aruba”, asina un comunicado di prensa emiti dor di Minister Andin Bikker ta inicia bisando. E mandatario a sigura cu e relato ta e opinion di tanto Gobierno Hulandes como esun di Aruba. “Ta rechasa e demandanan y ambos pais lo presenta na Corte pa medio di abogadonan pa specialisa e argumentonan pakico ta di tal opinon”.
Mas leu Minister Andin Bikker a duna di conoce cu ora un caso ta bou di hurisdiccion di Corte no ta usual pa duna comentario den dataye, den cuadro di e debido respet pa e poder hudicial.
Esey ta enteramente un otro opinion di Andin Bikker awe como Minister pasobra como abogado e tabata un di esunnan mas popular pa ta constantemente den media pa tin opinion publico na su banda. Den e caso aki el a opta p deposita su confiansa den su colega mr. Anthony Carlo pa defende pais Aruba. Staat der Nederlanden lo manda un abogado di e bufete Pels Rijcken pa defende nan interesnan, mientras cu e Venezolanonan lo conta cu acesoria legal di abogado David Kock y su bufete.
Por premira un bataya legal formal den Corte na Oranjestad diabierna awo, den cual e mihonan di Aruba y Hulanda lo enfrenta otro den un caso historico. Ta bisa esaki pasobra si abogado Kock haya rason, ta henter e maneho di asilo na Aruba y di Reino Hulandes lo cambia.
De facto, e opinion di abogado mr. David Kock ta, cu Hulanda no por sinta man crusa na Den Haag y opina riba e desaroyonan di peticionnan di asilo drentando na Aruba. E ta haya cu Hulanda ta e prome responsabel pa atende e asunto aki, sigur financieramente. Asina cu Hulanda hay’e ta paga pa alimentacion, pa alohamiento, educacion y cuido medico na Venezolanonan refugia na Aruba, mesora e lo busca un solucion, locual awor e no ta haciendo.
Algun luna pasa Gobierno di Hulanda a hasta regala Colombia miyones di Euro pa maneha e fluho di Venezolanonan den e pais, mientras cu den su mesun cura, esta na Corsou y Aruba, e no ta yudando financieramente.
1
