Diamars tambe den oranan di merdia a yega Aruba un delegacion di basketball, cu a trece otro titulo campeonil a Aruba. Nan a participa den “3rd Annual Sky Hook International Tournament 2019”.
Loke tabata interesante den e campeonato aki tabata cu e hoben Christopher Eubanks a bini Aruba cu e premio di Hungado Mas Valioso (MVP). E ekipo ta consisti di hobennan di diferente ekipo di basketball di Aruba y nan a bin ta entrenando hunto pa tres aña caba. Pa Eubanks e tabata un experencia grandi, hungando contra hopi mas rapido. Na Aruba tambe el a yega di gana e premio di MVP
Loke cu a resalta den e participacion di Aruba, segun e coach Jurvin Maduro, nan a competi contra ekiponan cu tin un rutina programa y tin e miho facilidadnan na nan disposicion.
Carmelina Berkel, Secretaria di Aruba Basketball Bond, a biaha como delegado y a expresa cu nan ta contento cu resultado unda a hunga seis wega y a perde solamente uno. Den e final a hunga contra e team di cas y a keda como campeon.
E ta un ekipo di U-17 y tin muchanan di 12, 15 y 16 aña. Aña pasa caba nan a biaha pa Miami unda nan a keda como campeon tambe.
E experiencia aki ta laga e muchanan mira cu si nan haci nan esfuerso, nan por logra hopi den exterior. Basketball na Aruba mes ta creciendo y tin mas ekipo surgiendo. E unico cu falta ta pa e fanaticadanan cuminsa yega e terenonan di basketball.
