E barco di Marina Hulandes Zr.Ms. Groningen riba dialuna 25 di augustus a intercepta 390 kilo di cocaina. E hecho exitoso aki tabata den estrecho cooperacion cu Wardakosta Mericano. E droganan y e tripulacion di e barco intercepta a keda entrega na autoridadnan Mericano pa sigui cu e enhuiciamento.
E barco di patruya Zr.Ms. Groningen for di april di e aña aki ta activo den Area di Caribe. E barco patruyero ta actua contra di trafico di droga y por keda empleá pa yudansa humanitario. Ademas di esey e barco ta keda emplea den diferente tareanan di Wardacosta den area di Caribe, tal manera intercepta pesca ilegal, delitonan contra di medio ambiente y pa accionnan di rescate.
Pa por eherce e tareanan aki e barco ta ekipa cu un helicopter ‘NH90-boordhelikopter’ di e Comando di Helicopter di Defensa, y dos barco di intercepcion FRISC. En conexion cu e finalisacion hudicial di e caso, tabata posibel te cu aworaki numa pa saca e informacion aki.
Cambio di Tripulacion
Desde april 2019 Marina Real Hulandes a cuminsa cu un programa ‘piloto’ den cua e barco Patruyero Zr.Ms. Groningen ta permanece dos aña den Area di Caribe, y e tripulacion ta cambia den su totalidad. Antes tambe e barco tabata keda cambia na ocasion di cada rotacion.
Durante un ceremonia simpel awe e tripulacion a keda cambia y e Comando a keda traspasa pa e Comandante nobo. Esaki a sosode simbolicamente cu traspaso di un yabi grandi di e Comandante saliente, Kapitan-Luitenant Ter Zee Lex van der Kraan (Tripulacion Blauw) na e Comandante entrante Kapitan- luitenant ter zee Nicole Kuipers (Tripulacion Blanco).
Tripulacion Blauw durante di su estadia a intercepta seis cargamento di droga, durante cua casi 3500 kilo a keda interceptá. E tripulacion a eherce cinco accion di rescate den cua 57 persona a keda salba for di den lama. E barco den esaki a traha hunto cu tanto Wardacosta Caribe como tambe Wardacosta Mericano y e ‘Joint Interagency Taskforce South’.
