Tripulacion di zr.ms. van Speijk a rescata diasabra, 27 di Januari, 9 naufrago di un boto Panameño for di mar Caribe. Un avion di patruya di Kustwacht a descubri e boto aki mas tempran durante anochi. Zr.Ms. van Speijk tabata den vecindario pa un control di rutina, ora cu e tripulacion di e embarcacion a indica cu nan ta bayendo awa y cu e boto ta hundiendo. Poco rato despues a start un candela, unda cu via e marifoon a wordo informa cu no por stuur e boto aki mas. E nuebe naufragonan (6 Venezolano, 2 Colombiano y 1 Dominicano) a bula den awa. Cu NH-90 e helicopter abordo y algun boto mas chikito di Van Speijk, e naufragonan a wordo saca for di den awa y treci abordo di Van Speijk, unda cu nan a ricibi cuido.
E embarcacion durante oranan di anochi a sink. Van Speijk ainda a purba di busca pa e restonan y a sigura cu no tin ningun peliger pa nabegacion. E naufragonan a wordo pasa pa autoridadnan local na Aruba, cu lo sigui haci investigacion riba e situacion y circumstancianan.
Zr.Ms. van Speijk ta opera desde fin di October como barco staciona den e area di Caribe. Pa combati trafico di droga, e barco tin un Law Enforcement Detachment di Guarda Costa Mericano abordo. Den cuadro cu combatimento di droga nan tabata exitoso previamente: riba dia 22 di December, van Speijk a interepta 550 kilo di cocaina riba un Go-Fast y riba bispo di aña e LEDET di e barco a intercepta cerca di 1600 kilo di cocaina.
