E bista di un barco crucero hopi cerca di costa di Aruba a hala atencion cerca hopi hende, pa motibo cu e isla aki otronan den Caribe den lockdown. A resulta cu e barco ta buscando provision pa e barco y e tripulantenan abordo.
Por a mira e barco aki net pazuid di Oranjestad. Ta trata di e crucero Seabourn, cu ta di un linea di barconan luhoso. Manera ta conoci, ora cu e lockdown a cuminsa, mester a baha tur e pasaheronan abordo. A dura hopi pa logra esaki. E situacion aki tin practicamente tres luna andando. A resulta tambe cu no tabatin suficiente puerto pa ricibi e barconan crucero pa cual nan a keda ta “idle”. Simplemente mester spera momento cu por cuminsa haci biahe’ki.
Esun cu tabata cerca di costa di Aruba ta Seabourn Odyssey. E crucero aki ta un di esnan cu no a haya un puerto vast pa keda. A keda rond di Caribe cu su tripulacion abordo. Y cada tanto tempo mester yega cerca di costa pa tuma provision.
Seabourn Odyssey ta di Carnival Cruises y como cu e ta un barco luhoso, su capacidad maximo di pasahero ta 650 y e tin un poco mas cu 400 miembro di tripulacion. E ta registra na Bahamas.