Barcelona lo “showcase” su trofeonan den Latinoamerica cuminsando na maart

118

Barcelona, e 26 biaha campeon di e Liga Spaño y cu cinco titulo di Champions League di Europa, lo “showcase” un gran parti di su trofeo y obhetonan di balor historico den e expo “Barca, The Exhibition” den Latinoamerica, cu lo cuminsa na maart na Mexico.

Den un rueda di prensa den e capital Mexicano, e organisadonan di e proyecto a informa diahuebs cu dia 5 di maart lo cuminsa cu e exhibicion den un sala den e Ciudad di Mexico, cu lo ta dividi den nuebe seccion caminda cu 80 persona por acudi cada 15 minuut, cu respet na e medidanan pa evita e contagio di COVID-19.

E fanaticonan di futbol lo bishita di manera virtual Camp Nou y lo admira e trofeonan, balanan di oro, articulonan uza pa e principal futbolistanan y firma pa nan, ademas di conoce detayenan di e historia di e club.

Sebastian Saidman, director pa Mexico di “Barca, The Exhibition,” a celebra cu e muestra cuminsa na Mexico, un pais cu hopi fanatico di Barcelona, y a afirma cu e ticketnan lo ta na benta entrante diahuebs, cu descuento.

Aunke e finalnan di siglo pasa e simpatia di e fanaticonan Mexicano siguidoan di La Liga tabata mas pa Madrid, pa e presencia den e cuadro merengue di e goleado Hugo Sanchez, kende a gana cuater di su trofeonan Pichichi cu e conhunto blanco, e yegada di e defensa Mexicano Rafael Marquez na Barcelona den 2003, a lanta den e pais e pasion pa e ekipo Catalan.

Capitan di FC Barcelona, Sergio Lozano ©, lantando e copa di Champions League di futbol di sala despues di a vence ElPozo Murcia den e final den Palau Blaugrana. EFE/ Enric Fontcuberta/Archivo

E organisadonan di e exposicion a splica cu despues di vincula e bishitantenan cu e pasado di e club, e fanaticonan lo realisa un biahe virtual den historia y recuerdonan di Barcelona pa despues experimenta kico e hungadonan ta sinti ora nan pasa den e tunel cu ta hibanan riba veld.

Un tienda lo pone na benta e jerseynan original y productonan di e ekipo, despues di cual e asistentenan lo tin e posibilidad di participa den concursonan interactivo den cual nan por mustra nan habilidad.

Despues di permanece na Mexico te cu dia 1 di juni, e exhibicion lo tuma luga na Guadalajara, Monterrey y Puebla pa despues yega Costa Rica den 2021, pa Colombia na comienso di 2022 y despues sigui den America Latina y e resto di mundo.

No ta conoci si e exhibicion aki lo pasa aki na Aruba, caminda cu tin un cantidad grandi di hende ta fanatico di e ekipo Spaño aki.

Ainda nos por corda cu na november di aña 2013 pasa e trofeo di Copa Mundial a pasa na Aruba den un exhibicion unico, caminda cu grandi y chikito por a tira un bista unico riba e trofeo aki, cual a tuma luga na Windham.

Lo ta hopi interesante si e trofeonan di FC Barcelona pasa na Aruba. Esey sigur lo ta un experiencia singular cu hopi hende lo aprecia, y mira asina di cerca e logro di un di e ekiponan di futbol mas famoso na mundo.