For di Happy Hour pa Ladies Night, barnan ta inventa tur clase di campañanan promocional pa purba atrae damanan den nan establecimento. Pero un bar na Dubai ta birando popular despues di a bin cu un promocion cu ta ofrece damanan bebidanan gratis, a base di con hopi nan ta pisa. Di acuerdo cu e promocion, mas pisa bo ta, mas hopi bebida bo ta haya!
Fusion Club ta un bar di cuater strea den Cassells Al Barsha Hotel, cu ta ofrece specialnan tur dia te cu fin di aña. E promocion ta traha asina: Un dama por sea pisa su mes riba un balansa na entrada di Fusion Club of simplemente por skirbi su peso riba un pida papel y duna e bartender.
“Apesar cu nos tin un balansa na entrada di e bar, nos no ta insisti pa nos huespednan verifica nan peso,” e gerente di food and beverage di e hotel, Anil Kumar, a conta. “Nos ta kere nos damanan huesped,” el a agrega. “Nan por simplemente skirbi nan peso riba un papel y duna esaki discretamente na e bartender y disfruta di e bebidanan, ekivalente na e cantidad cu nan a skirbi riba e papel. Hopi simpel, no strings attached“.
Pa cada kilogram, damanan na Fusion Club ta haya un Dirham Emirati, e moneda di e Emiratonan Arabe Uni ($1 ta ekivalente na $3.67 AED). Esey ta nifica cu un dama cu ta pisa 150 liber, por haya bebida na balor di $68 AED of mas of menos $18.50 dollar. E deal aki ta aplicabel pa cualkier bebida den e bar.
Fusion Club ta kere den “ta diferente cu e resto di clubnan nocturno y hotel den maneha nos huespednan. Nos kier pa e damanan sorprende nan pareha y amigonan cu ta bon pa subi di peso”.
“It’s good to gain weight” ta lema di e promocion, apareciendo riba posternan pa e deal, como tambe riba e balansa na e bar. Algun establecimento na Dubai a raporta cu tin hende tin pensamentonan mixto pa loke ta e deal, pero Kumar a bisa cu e promocion tabata asina positivo cu e bar a dicidi pa extend’e te cu fin di aña.
“Nos no mester ta demasiado serio riba tur cos,” el a agrega. “Dubai ta un ciudad pa entretenimento y diberticion. Nos nunca ta pidi e damanan pa check nan peso, nos ta confia nan y nos ta sirbi nan pa cualkier cantidad cu nan skirbi riba e papel sin puntra nada. En todo caso, nos no ta mira e rason pakico mester sinti cualkier mal intencion tras di e oferta.”
Kumar y Fusion Club ta ofrece promocionnan “loco y unico” tur luna pa tanto hende homber como tambe pa hende muhe. Un otro promocion cu e bar tabatin ta tres bebida gratis tur anochi pa damanan cu ta entre 30 y 40 aña di edad.
