Diabierna atardi a yama un reunion cu e lidernan di banda pa discuti un proposicion cu tin riba mesa pa un parada cu nan kier organisa riba diamars, dia 5 di Maart.
Segun Bobby Gibbs, a bin ta pidiendo pa e posibilidad pa musiconan por organisa un parada, door cu e kimamento di momo cu tabata antes riba diamars despues di Carnaval, no tey mas, e ora a pidi si por haya e vergunning pa organisa un parada hunto cu e musiconan.
Den e forma ey a yama un reunion pa por discuti esey cu nan. Gibbs ta sigui splica cu a scucha diferente argumento di diferente lider di banda, entre otro nan gastonan, loke ta esun principal. Pa pone un parada extra riba caya, e tin su gastonan cun’e. Entre otro e ekipo di zonido, trekker, drivers, full e ekipo pa por mantene un grupo riba caya. Esey tabata e punto cardinal di discusion.
A scucha nan y a brainstorm hunto cu nan riba e posibilidadnan cu tin pa toch haci e parada aki uno cu ta factibel. Esey tabata e discusion durante e reunion.
Despues cu a sinta scucha tur e argumentonan bay bin, tabata tin banda cu a bisa cu e ta factibel. Otro ta bisa cu por ta por lag’e bay pa otro aña. Pero a sinta delibera y a bisa nan cu ta duna nan te cu dialuna, pa nan trece nan feedback, bay den nan seno, wak si e ta posibel pa nan y bin bek dialuna y informa si esaki ta posibel of no.
Door cu esaki ta prome biaha cu ta poniendo e parada aki riba pia, no a specifica preciesamente kico lo bay cun’e. A bin argumento of proposicionnan riba mesa pa por acerca tambe DJ y brassbandnan, pa nan tambe por join in riba e parada. Ta algo cu a tuma nota di dje y ta tene cuenta cun’e.
Dialuna awo ta haya feedback di e bandanan, e ora lo anuncia si e “Old Mask Parade”, riba diamars, dia 5 di Maart, lo sigui.
Melvin Garcia tambe tabata tey presente durante di e reunion aki. El a splica cu e idea ta uno fenomenal. A pone den nos cabes cu carnaval ta caba e diadomingo di parada grandi. En realidad tradicion di tur e añanan atras, prome cu SMAC y durante SMAC, tabata cu Carnaval ta caba diamars anochi, mey anochi ta bira e diaranson di shinishi. Ta un tremendo idea, pa ta un clausura cu tur e bandanan di Aruba pa asina ey bisa cu ta cer’e cu broche de oro pasobra e musica di Aruba, e Roadmarch di Aruba of con cu kier yam’e, e ambiente di Aruba, no por muri riba diadomingo. E tin cu caba diamars, manera cu semper tabata e caso.
Cu diamars carnaval ta caba, no diadomingo. E idea ta tremendo, segun Garcia.
Tin cu sinta, pasobra tin un lista di logistica cu tin cu check, manera generator, trekker, zonido, trailer, musiconan tambe riba nan mes y wak si ta factibel pa por bay diamars den e parada.
Ta cuestion sinta y combersa, wak kico por saca afor di esaki, pone un telleraam y un bon calculater cu cifra grandi. Cada biaha cu un banda subi caya, ta costa placa. No ta un secreto cu tin banda cu no tin sponsor y tin banda ta riba nan propio forsa nan ta draai.
Tin hopi cu tin cu regla, wak si e ta factibel financieramente, si of no, segun Melvin Garcia.
Ofo Escudero a vocifera durante e reunion, cu e ta kere cu esaki lo por ta un bon parada pa futuro. E no ta mir’e visibel pa e aña aki y ta riba man.
Ta cosnan cu tin cu papi’e for di tempran, trece for di tempran y no bin ad hoc riba dje. E ora ey hopi biaha, tipo di cosnan asina, nunca ta sali manera debe ser. Chens pa e bandanan wordo perhudica economicamente ta basta grandi, mirando e tempo cortico.
Den algun dia tin cu organisa algo y tin cu mobilisa cosnan. Ainda tin e paradanan grandi cu ta biniendo. E fin di siman aki ta duro, cual tabata Jouvert, Lighting Parade, parada di mucha na San Nicolas. Ainda tin otro siman cu tur e bandanan ta druk casi full e siman.
Ki ora ta haya chens pa prepara algo bon. Ta algo cu ta e bandanan tin cu genera, ta e bandanan tin cu haya un quotation di e gruponan di zonido pa nan haya un prijs, cu e shirt y mascarada. E no ta mira esaki visibel pa e aña aki.
Pero si e ta un bon assett pa otro aña, pero tambe ta kere cu toch den temporada di carnaval tin tiki parada dimas. Si por tin menos parada, ta bay tin un tiki mas smaak pa e hendenan join e tiki cu tin y haci nan grandi.
Awor aki tin por ta cantidad y no calidad, si tin cu pone asina. Calidad den atendencia, esey ta wak’e vooral den tipo di otro paradanan cu tin cu bay evalua si cierto paradanan tin cu sigui si of no.
Escudero no ta sinti mucho interes den nan, el a termina bisando.
