Recientemente Banco Central di Aruba y CAFT, e organo di supervision financiero Hulandes, a publica e cifranan di debe, economia y finanzas publico di Aruba di aña 2018. Locual ta resalta di e publicacionnan aki ta cu Banco Central di Aruba y CAFT ta uza cifranan hopi diferente pa e size di economia di Aruba, pa 2018 e diferencia aki ta 620 miyon florin. E uzo di cifranan di economia diferente aki ta resulta den un diferencia di casi 10 punto di e debe como porcentahe di economia, esta 74.8% segun Banco Central di Aruba y 83.8% segun CAFT.
E debe como porcentahe di economia, e asina yama “schuldquote”, of “debt to GDP”, ta un indicador di e estado financiero di nos Pais cu ta wordo sigui door di varios instancia international y ta un di e metanan financiero importante palabra entre Gobierno di Aruba y Gobierno Hulandes den e “Protocol Aruba-Nederland 2019-2021”.
For di e presentacionnan por conclui cu e motibo pa e diferencia ta cu Banco Central a dicidi di sigui e cifranan di economia actualisa di Centraal Bureau voor de Statistiek (CBS).
Recientemente CBS a caba di actualisa e calculacion di e tamaño di nos economia te cu aña 2017. Un proyecto cu a dura e oficina di estadistica Arubano algun aña pa finalisa. CAFT sinembargo no a sigui e cifranan di CBS y ta wardando un aparente auditoria di e cifranan aki door di fondo monetario internacional, IMF.
Manera menciona, pa motibo di esaki e desaroyonan den 2018 ta mustra hopi diferente den ambos presentacion. Aunke e debe absoluto di Aruba den ambos publicacion ta mescos, esta 4,286 biyon florin (4 biyon, 286 miyon y 300 mil florin), un aumento absoluto di 128 miyon florin di 2017 pa 2018. Como porcentahe (%) di economia e diferencianan ta enorme, segun Banco Central e debe di Aruba ta 74.8% y segun CAFT e debe di Aruba ta 83.8%, casi 10 punto mas.
Y aunke den ambos presentacion e debe como porcentahe di economia ta baha den 2018 pa motibo di e crecemento economico cu a tuma luga, e diferencia den e indicador aki por tin consecuencianan grandi y por spera discusion riba esaki den e tempo nos dilanti.
Un di e motibonan ta cu den e protocol cu Aruba y Hulanda a cera, a palabra un meta di 70% di e debe na 2027 y un debe di 50% na 2039. Den e caso cu uza e cifranan di Banco Central y CBS, e meta di 70% ta hopi mas cerca di realisacion cu si uza e cifranan cu CAFT ta uzando. Es mas, si Gobierno mantene su mes na e metanan di crecemento di debe den 2019 y 2020 y e economia di Aruba crece manera e ta anticipa awor, e norma aki por wordo realisa den e periodo di gobernacion actual.
Mientrastanto CAFT ta wardando resultado di e deliberacion entre CBS y IMF riba e calculacion di economia di Aruba. E hecho cu Banco Central di Aruba a cuminsa adopta e cifranan di CBS den nan publicacion di estadistica por ta un indicacion cu e cifranan calcula pa CBS no lo cambia mucho.
