Banco Central: Gobierno cu surplus di 40 miyon florin di april pa juni 2018

Ayera, dia 24 di october, Banco Central a publica e ultimo cifranan di e finanzas publico di Gobierno di Aruba riba su website www.cbaruba.org. For di e publicacion aki por destila cu den e di dos kwartaal di 2018, gastonan di Gobierno di Aruba tabata 40.6 miyon florin mas abou cu su entradanan. Den otro palabra, Gobierno di Aruba a logra un surplus financiero di 40.6 miyon florin.

ADV

Pa henter aña 2018 Gobierno su gastonan tabata 2.8 miyon florin mas halto cu su entradanan. E cifranan di Gobierno di Aruba ta prome cu Gobierno a aumenta impuestonan, introduciendo e asina yama crisisheffing, cu a tuma lugar entrante prome di juli 2018. 

Ora analisa e cifranan aki, por nota cu gastonan di Gobierno tabata 7.3 miyon florin mas abou den e di dos kwartaal di 2018 cu e di dos kwartaal di 2017. Esaki ta causa particularmente pa un caida den e categoria “goederen en diensten” cu 10.3 miyon florin. Fuera di esaki por nota un aumento di entrada di Gobierno cu 54.4 miyon florin.

E aumento aki ta causa particularmente pa un aumento den e categoria di entrada cu ta contene dividendonan cu companianan estatal ta duna Gobierno di Aruba. E categoria di entrada aki a subi di 28.7 miyon florin den e di dos kwartaal di 2017 pa 71.4 miyon florin den e di dos kwartaal di 2018, esta un aumento di 42.7 miyon florin. 

E publicacionnan di Banco Central tocante finanzas publico di Gobierno di Aruba, ta hopi extenso y ta trata tambe cifranan di prestamonan cu Gobierno a haci, detayes di e entradanan cu Gobierno a genera, y comparacionnan di diferente aña. Por lesa e publicacion aki: https://www.cbaruba.org/cba/readBlob.do?id=4855

 

Comments

comments