Diabierna ultimo, Banco Central a publica su ultimo “statistical news release” unda e ta relata riba e posicion financiero di Gobierno. Den e documento aki Banco Central di Aruba ta analisa e cifranan financiero di Gobierno for di cual cu por conclui cu e situacion financiero di Gobierno a mehora considerablemente compara cu e aña anterior.
Asina Banco Central ta publica cu e gastonan di personal di Gobierno, e asina yama `wage related spending`, a baha cu 55 miyon florin compara cu e aña anterior. Banco Central ta raporta cu e cifranan aki ta relaciona cu un reduccion di gasto di personal, den diferente categoria, manera subsidio di salario, salario y e contribucion di Gobierno como doño di trabao na fondonan social.
Segun Banco Central, e crecemento di e debe di Gobierno tambe a reduci compara cu e aña anterior. E deficit den 2017 tabata 132.3 miyon florin compara cu 183.7 miyon florin e aña anterior (2016). E reduccion di e deficit di Gobierno ta causa door di un aumento di entrada di Gobierno cu 5.7 miyon florin combina cu un reduccion di gasto di Gobierno di 40.9 miyon florin.
Banco Central ta publica tambe cu e debe di Gobierno di 2017 a termina na 4,199 miyon florin. E suma aki ta reparti entre 2,087.4 miyon florin na debenan local y 2,111.6 miyon florin na debenan internacional.
Por lesa e rapport completo door di click riba e link aki:
http://www.cbaruba.org/cba/readBlob.do?id=4453
