Contrario na publicacionnan anterior den cual e propio Banco Central di Aruba (CBA) a desmentí cu Ennia Aruba ta cay bou di supervisión di Banco Central di Corsou y Sint Maarten of c unan por tin algo di haber cu e retonan cu e companianan na Corsou y St. Maarten ta confrontando, ata awor ta sali información cu debidamente Banco Central di Aruba a “interveni” recientemente mediante un decision y direccion den Ennia Aruba.
Esaki a sosode despues cu Banco Central di Aruba a nenga den un comunicado di prensa dia 5 di Juli ultimo relaciona cu e situacion di Ennia Aruba y den cualkier caso, a sigura di no a tuma ningun medida, mientras cu Banco Central di Corsou y St. Maarten (CBCS) a pronuncia e regulacion di emergencia y tambe a kita casi tur esunnan responsabel den gerencia for di nan puesto.
E propio Banco Central a nenga di duna informacion, aunke a pidi explicitamente, pero, segun e corant Algemene Dagblad, nan tin material suficiente pa establece cu CBA a emiti un decision dia 24 di September 2018, mas di dos luna y mey despues. Como resultado di e decision, Ennia Aruba, no ta cumpli cu e rekisitonan cu ta deriva for di e Ordenansa Nacional di Aruba di supervision riba companianan di seguro (Ltv).
Mientrastanto Banco Central di Aruba tambe ta di opinion cu e confiansa di esunnan responsabel pa e compania cu ta posee un participacion cualifica den Ennia Aruba “no ta for di tur duda”. E decision ta menciona specificamente nomber di Ralph Palm y Abdallah Andradus, cu ta respectivamente e Directornan di Ennia Caribe Holding (Aruba) prome cu e regulacionnan di emergencia (na Corsou y St. Maarten) y despues a keda Aruba. Banco Central di Corsou y St. Maarten a kita nan for di nan puesto na Corsou y Sint Maarten pero Banco Central di Aruba a laga nan den nan funcion di gerencia, te cu dia 24 di September.
Den Registro na Camara di Comercio ta mustra cu ainda nan ta den funcion.
E ordo di Banco Central di Aruba awor ta cu e compania di seguro Ennia Aruba no mag sigui ningun instruccion di Ennia Caribe Holding (Aruba) te na momento cu CBA determina cu por confia cu e responsabilidad di gerencia di Ennia Caribe Holding (Aruba) ta for di tur duda.
Di acuerdo cu e structura di e organisacion, Ennia Caribe Holding (Aruba) ta resorta bao di EC Holding di Corsou, cu, den relacion cu e regulacionnan di emergencia, Banco Central di Corsou y Sint Maarten (CBCS) ta dirigi henter e administracion for di Willemstad.
Ta pesey desde cu a bira conoci cu Ennia na Corsou ta den problema, mesora a informa di e retonan pa Aruba tambe. E tempo ey Banco Central a opta pa hiba un maneho di avestruz, pa haci comosifuera nada ta pasando of cu e retonan ta na Corsou y Sint Maarten so, comosifuera cu e lo no afecta Aruba. No a dura mucho cu ata awor e mesun Banco Central di Aruba a sali tuma medida, pa salvaguardia tur cliente di seguronan di Ennia na Aruba.
Nos a pidi pa opinion di Banco Central di Aruba, pero no a haya un reaccion ainda.
