A dura 7 aña pa por a cuminsa y caba e proyecto aki. Tabata na aña 2012, bao Gabinete Mike Eman 1 cu a start e proceso pa cambia diseño di nos placa di papel. Normalmente esey ta sosode cada 10 aña, pero den e caso aki na 1997 tabata e ultimo diseño y cu adaptacion na 2003, pues ta despues di 16 aña cu ta presenta e edicion nobo di placa di papel. E cambio mas grandi ta e denominacion di 500 florin, esun menos uza, cu awor a bira 200 florin.

E ceremonia oficial a cuminsa casi 1 ora lat, wardando riba yegada di Prome Minister mr. Evelyn Wever-Croes y Minister di Finansa, mr. Xiomara Maduro. Asina mes e publico invita pa presencia presentacion di nos placa di papel nobo, no a laga esey stroba ni baha e interes pa cera conoci cu e denominacionnan di nos placa, cargando nos historia y herencia cultural.

Banco Central a presenta diseñonan nobo pa nos placa di papel

Banco Central a presenta diseñonan nobo pa nos placa di papel

Posted by 24ora on Friday, May 17, 2019

 

Presente tabata Presidente di Hunta di Supervision di Banco Central, mr. Arie Swaen, Presidente di Banco Central, Jeannette “Jane” Semeleer y demas directornan di e banco.

E diseño nobo di nos 10 florin

“Ta un proyecto di 8 miyon florin pa nos a diseña, imprimi y distribui e placanan di papel nobo riba mercado”, asina Jane Semeleer, Presidente di Banco Central, a duna di conoce den un entrevista despues di e presentacion oficial cu a tuma luga den Banco Central mas. “Nos a imprimi suficiente placa pa wanta nos 5 aña largo, teniendo cuenta cu esunnan mas uza semper ta e denominacion di 10 y esun di 100 florin”.

Dia 3 di juni proximo lo entrega e prome placa di papel, mientras cu publico lo cuminsa haya e placa aki na banconan desde dia 4 di juni. Pa e siguiente 10 simannan, esta te dia 11 di augustus 2019 por uza ambos placa di papel, aunke banconan lo no otorga e diseñonan di aña 2003 mas. Desde dia 12 di augustus 2019 e serie di aña 2003 ta sali for di circulacion completo y no por uz’e mas como pago oficial. Pa 6 luna largo, pues te dia 4 di december 2019 por cambia bo placa di papel “bieu” pa esun “nobo” na cualkier banco comercial. Pero despues di dia 5 di december 2019 y pa 30 aña largo, pues te dia 12 di augustis 2049, lo por cambia e placa di papel di e diseño di aña 2003 na Banco Central so.

A haci un competencia entre varios artista pa nos placa di papel nobo y e ganado absoluto a resulta Nigel Matthew.

Comments

comments