Banco Central a introduci diseño nobo di nos Florin na comercio

Desde dialuna dia 3 di juni 2019 oficialmente por a cuminsa uza e diseño nobo di placa di papel pa haci pago. Banconan comercial ta distribuyendo e diseñonan nobo pocopoco e siman aki. Pero e mesun Presidente di Banco Central, Jane Semeleer, a opta pa haci un prome pago cu e placa di papel nobo dialuna na Baz-Rrr Galleria & Brasserie.

Esaki ta bira e di dos diseño cu e mesun Presidente di Banco Central ta firma riba cada un biyete. Poco Presidente di Banco Central tabatin e honor di tabatin dos biyete cu nan firma riba dje, algo historico.

Banco Central tin nan mesun pagina riba red social, ArubaSuFlorin y ta encurasha tur cu ta publica potret di e placa di papel nobo, pa uza e hashtag #MiFlorin.

Entretanto tur banco comercial tin e placa di papel cu diseño nobo caba cla pa distribui bou di nan clientenan. Algun banco a confronta retonan tecnico como cu e tamaño di e placa di papel nobo ta mas grandi cu e modelo di aña 2003. Ta cuestion di calibra e mashinnan miho pa procesa e placa aki sin problema y sin haci eror.