Den un carta dirigi na banconan local y na Conseho di Minister fecha 19 di Maart 2019, Banco Central ta adverti banconan pa e compania Three Rivers Real Estate N.V. Referiendo na publicacionan den medionan di comunicacion cu e compania aki lo ta envolvi cu e proyecto di hotel na San Nicolas lansa dor di Ministernan Otmar Oduber y Dangui Oduber, Banco Central ta pidi tur banco comercial pa ta hopi cauteloso si nan wordo pidi pa forma parti di e proyecto hunto cu e inversionistanan aki.
Banco Central ta adverti banconan pa e identidad mes, su directoran, su accionistanan of su beneficiarionan. E carta di Banco Central ta mustra riba obligacion di banconan pa tene cuenta cu “Landsverordening voorkoming en bestrijding witwassen en terrorisme financiering”.
Atrobe e pregunta ta surgi unda Ministerio Publico a keda ora den e tipo di casonan asina, unda cu di un dia pa otro ta presenta un Mega Proyecto cu inversionistanan dudoso cu den tempo relampago a haya tereno y tur sorto di permiso pa construi un hotel di 900 camber pa San Nicolas. Cualkier hende mester por pensa cu e “extra empuhe” aki ta rekeri investigacion profundo!
No ta un cos chikito ora Banco Central haya necesario pa asocia inversionistanan cu cual dos Minister ta negociando cune, cu posibel casonan di labamento di placa te pa manda un advertencia asina pa tur banco. E caso aki ta hopi serio y ta di mira con awor Parlamento y Ministerio Publico lo atende cu e caso aki.
Pa evita cu ta desmenti e noticia, 24ora.com ta publica adhunto e carta di Banco Central pa henter comunidad por mira e gravedad di e preocupacion di Banco Central pa cu proyecto y inversionistanan cu Gabinete Wever Croes ta envolucra cune.
Loading…
Reload document 
Open in new tab 
