Riba djaluna 19 di novèmber a hasi e apertura ofishal di Siman di Lesa Buki den un ambiente ameno na M. M. Römerschool.
Durante e periodo di 19 di novèmber te ku 23 di dezèmber, Biblioteka Nashonal di Kòrsou na nòmber di Gobièrnu di Kòrsou ta organisá e Siman di Lesa Buki ku e meta pa duna atenshon speshal na e importansia di lesa.
Dikon lesamentu ta asina importante den desaroyo di un mucha i adulto?
Lesamentu ta amplia horizonte di hende, e ta amplia su vokabulario, e ta amplia e konosementu di palabra i ta siña un hende komprondé su konteksto mihó. Alabes e ta oumentá e abilidat pa skirbi mas mihó.
Un mucha o un adulto ku ta lesa, ta nota ku e tin abilidat pa komprondé tareanan mihó, analisá un situashon mihó i komprondé e mundu rondó di dje mas mihó.
Den e Siman di lesa Buki, nos biblioteka i Kòrsou ta skohe un tema spesífiko pa elaborá ariba.
E aña aki e tema ta “Amistat”, esta e relashon afektivo entre hende. E ta referí na e sintimento ku esun tin pa e otro. I kon nos mester anda ku otro.
Minister di Enseñansa, Siensia, Kultura i Deporte sra. Marilyn Alcalá-Walléta gradisí su kolega Minister, Zita Jesus-Leito pa inisiá e Siman di Lesa buki huntu ku nos muchanan.
Un danki alabes na nos Biblioteka Nashonal, nos outornan di buki i alabes tur instansha i spònser ku ta duna nan aporte pa stimulá nos muchanan i hóbennan lesa.
Finalmente Minister Alcalá-Wallé ta hasi un yamada na tur nos mayornan pa lesa ku nan yunan i sigui promové e lesamentu di tur forma posibel.
