Hopi hende sa bay busca un segundo opinion den exterior pa cualkier problema di salud cu por ta. Y esey Ricky Franken di 37 aña a bay haci tambe na Colombia. Parce cu e ta sufri di Epilepsia, pero ningun hende y dokter na Aruba tabata sa di esaki. Na Aruba un dokter tabata dun’e un remedi, cu na final parce tabata di hormoon. Door di e remedi aki, e tabata manera bira “drowsy”.
Mirando tur loke a pase, el a dicidi di bay busca un di dos opinion na Colombia, apesar di su poco recursonan, en busca di su salud. Na Colombia lamentablemente el a haya un ataca, unda cu el a haya un trauma na su cabes. Awe, e ta den un hospital na Colombia, pero nan no kier lag’e bay te ora cu paga su debenan cu e tin cu e hospital. Por bisa cu te asina leu e cuenta a yega 4 mil dollar, pero dia pa dia e ta birando mas caro, mirando cu for di dia 29 di juni, e ta interna. Dia pa dia e gastonan ta subi mas y famianan ta man na cabes.
Mama ta pidi yudansa pa su yiu malo pega na Colombia
Posted by 24ora on Saturday, July 6, 2019
Mama di Ricky Franken, Sixta, ta en busca di ayudo, pa asina trece su yiu bek cas. E ta spera cu comunidad di Aruba por dun’e un man p’asina por manda buske.
El a conta cu varios biaha Ricky ta cay flauw y a tuma e decision di bay Colombia, check su salud. Ricky y su pareha a bay. Pero yegando eynan, el a haya ataca den baño. E eror cometi, aunke no por bay mas riba esey, ta cu nan no a bay cu seguro. A asumi cu ta bay check salud y bin bek. Sixta ta sigui conta cu den baño ora cu el a cay, el a dal su cabes y sanger a yena den su craneo. A opera Ricky y aparentemente e tabata hopi malo.
Ningun hende no a spera esaki. Sinembargo nan tas pera cu pueblo di Aruba lo por contribui pa asina colecta e fondonan necesario pa por yuda trece Ricky cas. Ta trata di un suma cu e tin cu paga pa e por sali for di hospital y cada dia cu e keda extra, e suma aki ta subi.
Como cu el a bay pa un second opinion, no via AZV, nan no ta cubri esaki tampoco. Locual cu nan por haci, si acaso cu e mester bin, nan ta paga su pasashi. Esey ta via Departamento di Labor. A purba di tuma contacto cu varios Minister. Entre otro Ministernan Otmar Oduber, Dangui Oduber y tambe Glenbert Croes. Sinembargo no a logra haya contacto cu nan.
Pueblo di Aruba por yuda
Sixta Franken lo ta hopi gradicido si pueblo di Aruba por yuda. Por tuma contacto cun’e na 5654092 y asina por duna un granito de arena, pa asina por paga e gastonan medico pa asina e por bin bek Aruba.
E ta spera cu pueblo di Aruba por yud’e pa su yiu bin bek y e lo ta gradicido. Por yam’e na su telefon.
Abo como ciudadano por yuda Ricky bin cas bek mas pronto posibel. Ricky a bay en busca di su salud y a confronta cu un situacion fastioso na Colombia. E no a bay cu seguro di biahe cu ta pone cu e situacion a bira un tiki mas fastioso, pasobra e no por bin bek cas te ora cu e paga tur e suma cu tin habri na e clinica na Colombia. Tur amigo, conocinan di famia Franken, tanto di Sixta y Ricky por haci nan donacion pa asina e por yega cas mas lihe posibel. Abo tambe por yuda un famia pa alivia e dolor mientras tanto pa asina Ricky bin bek cas mas pronto posibel.
A contacta instancianan pero sin resultado. Ban haci un intento pa por yuda e famia aki.
