Un pais bon organisá, ku tin deporte na pechu ta sòru p’e tin maske ta un stadion na drechi ku ta kumpli ku tur reglanan internashonal . Nos na Kòrsou tin un stadion so ku tabata kumpli ku e reglanan ei ku ta stadion Ergilio Hato situá den e area di Brievengat. Pa kasi un aña kaba deporte na Kòrsou pa ser eksakto futbòl no por hasi uso di e úniko stadion ku nos tin ku ta kumpli ku reglanan di Internashonal. E tereno di wega den e stadion a keda den hopi mal estado despues ku a organisá un evenementu den e stadion. FDDK ku t’esun ku tin e stadion bou di su maneho i e organisashon ku a organisá e evenemento ta den disputa ken mester kubri e gastunan pa drecha e stadion. Miéntras tantu deporte ta ser perhudiká. Nos a komprondé ku tabatin posibilidat pa tene diferente weganan internashonal riba nos isla pero mester a kanselá nan pasobra no por usa e stadion. Aworakí nos por keda tira falta riba otro si tabata responsabel pa usa e stadion pa aktividat i ken tin ku hasi responsabel pe gastunan pero esei lo no yuda ku nada. Hecho ta ku nos tin un stadion para ku nos no por usa i ku nos no por permití pa e situashon aki dura mas largu. FDDK ta haña supsidio serka gobièrnu. Teniendo kuenta ku interes general frakshon di MAN ta di opinion ku un posibel solushon lo ta pa gobièrnu laga drecha nos stadion nashonal i deskontá esaki tiki tiki for di e supsidio ku gobièrnu ta duna FDDK. Den e akuerdo di gobernashon di e gobièrnu aktual tin komo punto di salida ku edukashon físiko en general i deporte en partikular ta pilarnan importante ku ta kontribuí na formashon i salu físiko, mental i spiritual di hende.
Den kuadro di esaki Parlamentario pa partido MAN sr Wimbert Hato ta aserka Minister di Deporte Enseñansa, Siensia i Kultura sra. Alcala Walle ku e siguiente preguntanan:
Minister ta konsiente di e echo ku nos stadion nashonal ta para sin por hasi uso di dje pa kasi un aña kaba.
Minister ta na altura ku tin un desakuerdo entre FDDK i organisadó nan di e evenemento ku ta pone ku por lo pronto ningun di dos lo no hasi nada pa drecha e stadion konsekuentemente futbòl i pueblo engeneral t’esun ku pa largu tempu lo no por hasi uso di e stadion?
Ku komo pais nos na e momentunan aki no ta dispone di un stadion ku ta kuadra ku reglanan internashonal ?
Si t’asina; kiko te pasonan ku Minister di deporte ta bai tuma pa koregí e situashon?
Gobièrnu por laga drecha e stadion i deskontá e gastunan envolví na un manera rasonabel for di e supsidio ku FDDK ta haña di gobièrnu ?
Wimbert Hato
