E añanan na scol secundario ta pa hopi hende un periodo di cual nan tin masha bon recuerdo. E ex-alumnonan di Colegio Arubano tambe ta recorda cu masha placer e tempo ey, cu tabata determinante pa nan futuro.
Nan ta recuerdo di les for di e docentenan cu a inspira, e localnan, e pleinchi di scol, e actividadnan pafo di scol y tur amistad cu a nace durante e añanan aki. Nos ta spera cu abo tambe tin bon recuerdo di Colegio Arubano y cu un laso duradero a surgi entre abo y nos scol.
Reunion: 23 di november 2019
Dia 23 di november 2019, nos ta celebra 60 aña di existencia durante un reunion festivo, pa cual nos tin e grato placer pa invita bo. Esaki ta un oportunidad unico, pa bo bolbe bishita bo scol, paden y pafo, combersa cu ex-compañeronan di klas y disfruta di e presentacion musical. Nos ta en espera di bo presencia, pa duna bo un bonbini y un recorido na bo scol, unda bo a pasa hopi aña di bo hubentud. Carchi di entrada pa e reunion festivo ta costa AFl. 60,- y ta obtenibel na scol, na nos Oficina di Secretariado. (e-mail: [email protected])
E necesidad pa reparacion grandi
Cu e recaudacion di e “Reunion Fundraising Event” aki, cu lo tuma luga na e “Reunion Plaza”, Colegio Arubano lo financia e reparacionnan necesario di e scol. Desde su fundacion na 1959, naturalmente a drecha hopi cos na e scol y na enseñansa. Nos ta purba bay cu tempo. Den e añanan venidero, nos kier sigui cu renobacion y mantenemento di e edificionan di scol, pero lastimamente e medionan financiero no ta alcansa. P’esey nos a acerca compania- y otro instancianan, pa nan duna nos apoyo financiero den e trabou grandi di reparacion di Colegio Arubano.
Bo aporte ta bonbini!
Nos kier haci un apelacion na abo tambe, como ex-Colegiano, pa bo ayudo. Nos ta pidi bo pa haci un donacion na Colegio Arubano. Cada suma ta sumamente aprecia. Tur placa ta destina na reparacion, mehoracion y renobacion di nos scol. Nos ta spera cu bo duna nos bo sosten! Bo por deposita bo contribucion riba nos cuenta di banco na RBC Bank 31336649, Aruba Bank 16602269 of CMB 21078005, cu e nomber “Steun opknappen Colegio Arubano ex-Colegiaan”. Cu bo ayudo nos ta compromete nos mes optimalmente pa un enseñansa di HAVO- y VWO di calidad halto na Aruba. E generacion actual y esunnan den futuro merece esey. Cu gusto nos ta topa bo dia 23 di november benidero na bo Colegio Arubano.
