E seccion internacional di Ballast Nedam a gana e destaho publico pa expansion di Aeropuerto Reina Beatrix, e asina yama “Enabling Works Project”. Cu e fin di maneha e creciente fluho di pasahero, principalmente for di Merca y Canada, lo modifica e edificionan di aeropuerto den forma significante. Varios compania a participa, pero Aruba Airport Authority a scoge pa e grupo Hulandes.
Ta trata aki di un proyecto grandi, prome cu cuminsa cu e renobacion grandi di Aeropuerto di cual a fia no menos cu mey biyon florin. E parti aki di construccion di un edificio nobo, conoci como e “Utility Building” ta pa maneha aspectonan tecnico, tin un costo total di 16 miyon dollar.
Aeropuerto di Aruba
Desde cu a contrata Schiphol Group pa maneha nos Aeropuerto, a nota un cambio drastico den un aeropuerto financieramente solido, y cu a converti den un di esunnan miho organisa den e region, purbando sistemanan innovativo pa por funciona mas eficiente manehando un gran cantidad di pasahero, manera por ehempel e proyecto di Happy Flow Aruba.
Un di e factornan di exito ta e acuerdo di pre-clearance cu Merca. E bentaha ta cu e aeropuertonan nacional/regional na Merca por bula directamente pa Aruba. E control na frontera ta wordo realisa den e terminal special di Merca na Aeropuerto Reina Beatrix na Aruba mes. E Mericanonan kier pa introduci e mesun concepto na Schiphol, pero Gobierno Hulandes no a reacciona cu mucho entusiasmo ainda.
Ballast Nedam
A funda e compania Ballast Nedam na Amsterdam-Hulanda, na april 1877. Su oficina principal ta situa na Nieuwegein, na Hulanda, pero ta traha y tuma proyectonan tur rond di mundo. E ta conoci den ramo di construccion y “Civil Engineering”. Entre e proyectonan cu el a yega di ehecuta tin entre otro rugnan,tunnelnan, careteranan, parkeerplaats y sin lubida rails pa trein. Na aña 2016 e tabatin no menos di 1900 empleado. E nomber cu e tin ta bin di un fusion entre e companianan Amsterdamse Ballast Maatschappij y Nederlandse Aannemingsmaatschappij.
