Baila cu otro: Un cancion cu un ritmo pegahoso

E pianista conoci di Jazz y docente di piano, Kyle Winklaar a lansa e cancion “Baila cu otro”, canta pa Miguel Genser, hunto cu un constelacion di musiconan renombra di Aruba, entre nan e bajista Reno Steba, Lazaro Guzman riba saxofon, Jeremy Bonariba riba drums y Christopher Rodulfo riba percusion.

Kyle ta conta cu e cantica aki tabata uno cu el a yega di skirbi y Unoca Cares a duna un man pa e produccion di e tema. Nan a menciona cu e mester ta algo pa forma parti di e comunidad di Aruba cu por causa un impacto.

E ta sigui splica cu e cancion ta pas net den e temporada aki y crea un impacto den e comunidad di Aruba. For di ey a dicidi di crea “Baila cu Otro”, cu ta encera tambe pa yuda otro den e temponan dificil, cu ta parti cuminda, unda cu den e video por mira Cruz Cora ta yuda den esey como tambe famia ta yuda famia.

Den e temponan aki tambe mester ta creativo cu e famia, pa por haci lo maximo di e situacion. Ta limita, pero ta forsa tambe pa biba un tiki diferente cu normal.

E videoclip

Un conoci di Kyle, Pierre Koolman a grab’e. E tabata hopi entusiasma pa forma parti di e proyecto. El a haci un hopi bon trabao, segun Kyle. For di esaki, Kyle ta bay sigui cu mas proyecto. E proceso di “Baila cu otro” tabata hopi dificil. Nan tabata tin diferente scenario entre otro lama, Cruz Cora y tambe nan famianan mes. A pensa con ta bay hink’e den otro pa e por cuadra.

Ta algo cu nan mester a plot pa hopi largo, pa kico por haci pa finalisa e proyecto. No tabata algo cu Kyle so a pensa. Tur input y feedback cu a haya a logra pa nan a finalisa e proyecto aki.

Ken ta Kyle Winklaar

Kyle ta un persona cu gusta yuda hende, pero tambe cu ta hopi alerta. Si tin un vibracion positivo of negativo, e ta sinti esey. E ta yud’e con pa acerca hende pa e traha hunto cu nan of yuda, en particular awo cu e ta duna les di piano na Cas di Cultura ya pa 3 luna caba.

Referente na esey, e ta bayendo hopi bon y door di cu su don di sinti vibracion di positivo y negativo, el a siña traha cu diferente mucha. E sinti aki, no solamente pa yuda hende, pero tambe pa e sigui bay p’adilanti.

Baila cu otro: Un cancion cu un ritmo pegahoso

Baila cu otro: Un cancion cu un ritmo pegahoso http://24ora.news/2NlbTmp

Posted by 24ora on Thursday, January 21, 2021

Reconoce talentonan scondi

Kyle a menciona cu hopi mucha na Cas di Cultura, tin e talento pa bay mas leu cu nan ta kere cu nan por bay. Pero hopi di nan ta distrai sea cu nan iPad of algo cu nan ta pasa aden personal. E por ta yen di cos. Den tur modo, nan no por concentra. Loke Kyle kier ta pa siña nan concentra, esey caba ta un leerprocess. Si por gara nan atencion pa cinco minuut, e por haci hopi cu nan. E ora ey por toch guia nan na un manera cu nan ta sinti cu e mester concentra.

E ta hopi leuk pa hunga, pero pa wak con leu nan habilidad pa concentra. Cada mucha ta diferente. Mester wak con ta hunga den e studiante nan mente pa nan por siña algo cu por ta nan por haci pa resto di nan bida.

Un manera di comunica y expresa

Ta hopi bon pa papia di musica cu diferente hende. Tin hopi talento riba Aruba y tin hopi cu ta dispuesto pa yuda haya e talentonan aki. Si por papia abiertamente loke ta sosode rond, manera si conoce un hende cu tin e talento aki y no ta exponi, por bay pe. Aki por yuda un otro.

Na Cas di Cultura e presupuesto no ta halto, aki por haya subsidio y por cuminsa for di aki.

Kyle lo kier acerca mayornan den sentido cu si e mucha no sa kico e kier, haci un tryout di diferente les. Laga nan tuma algun les di guitara, laga nan bay piano y tambe laga nan bay vibrafon, trompet, wak kico nan ta gusta. Nan no sa kico nan kier, pero nan sa kico nan gusta y kico nan no gusta.

Musica electronico

Semper Kyle a pensa cu musica electronico no ta un musica pa crea algo riba dje. Pero tur musica ta musica. Hasta tur zonido ta musica. Tin hende gusta rock, gusta metal, of bolero. Tur caminda tin un fundeshi. Reggaeton tambe, cu a bin di diferente genero. Aki por siña di unda e genero aki ta bin. Por siña nan algo cu nan no tabata sa. Esey toch ta interesante. Di nan interes, nan ta expande nan interes ampliamente na un manera hopi creativo.

Esey ta laga e muchanan compronde pa keda interesa y keda motiva pa sigui. Esey ta e meta di un docente pa inspira muchanan pa crea nan bida na un manera positivo, pero creativo tambe.

Mensahe

Specialmente pa mayornan, pa nan tin pasenshi cu nan yiunan. Nan ta duna señalnan cla di kico nan kier, pero no sa. Purba di wak con por hunga un rol den esey, cual por forma nan bida pa semper.