Ta apenas un luna pasa cu Aruba henter a haya un noticia sumamente tristo y lamentabel den cua a informa cu un baby di cuater luna a haya complicacion na un crèche y a fayece a consecuencia di esaki. Dia 24 di maart 2022 pa mas o menos 8:50 am a pidi ambulance acudi na un crèche situa na Wayaca pa un baby cu no tabata dunando señal di bida. Ora a yega na sitio mesora a cuminsa traha cu e baby, pero tur esfuerso y lucha tabata envano ya cu pa 10:00 am a ricibi e tristo noticia cu baby Noah a bay sosega.
Mas cu claro e noticia aki a causa hopi conmocion rond di nos isla. Desde un principio no tabatin mucho conocemento di kico precisamente ta locual a tuma luga, pero si tabatin informe cu dokter Eric Arends a pidi pa realisa un autopsia pa clarifica esaki debi cu baby Noah tabata un baby sano y mester haya sa ta di kico el a fayece. Asina tambe, awe e mama a publica riba su pagina di Facebook cu awe su angelito a cumpli un luna cu el a fayece y cu resultado di autopsia ta cla, pero ta wardando pa haya esaki den persona.
El a informa tambe cu lo bay tene un rueda di prensa pa conscientisa pueblo di kico baby Noah a fayece. Dokter Eric Arends lo bay t’ey presente pa splica riba e topico en cuestion. Tambe e mama a dune di conoce den su publicacion cu despues cu a dera baby Noah, a start dibiaha cu diferente reunion cu organisacion y instancia gubernamental pa traha hunto riba conscientisacion. Por ultimo, a informa tambe cu awe pa 6:00 pm lo tin un mis ana Savaneta pa recorda e prome luna cu baby Noah a bay sosega.
