AZV y Gobierno cla pa corta mas di 50 remedi!

Redaccion di 24ora.com a haya e lista y decision cu Gobierno y AZV pa kitamento di remedinan for di e “positievelijst geneesmiddelen” y pone nan riba un “criterialijst geneesmiddelen”. Esaki kiermen cu ta introduci un cantidad di criterianan pa dificulta, pa no bisa haci practicamente imposibel, e prescripcion di e remedinan cu ta aparece riba e “criterialijst”. 

Ta trata aki di un cantidad di condicionnan varia. E criteria cu ta resalta ta cu e dokter di cas no ta esun cu por prescribi e remedinan aki mas. E lo por, pero AZV lo no no paga e remedi pa e pashent. Poniendo e criteria aki y conociendo e barera pa yega na un specialista, AZV ta spera cu e prescripcion di e remedinan aki lo baha considerablemente. 

E situacion aki sigur lo bira algo hopi incomodo y hasta peligroso pa salud di pashentnan cu no lo haya of haya un remedi cu nan mester hopi laat. Pa dokternan di cas mester considera esaki un limitacion den nan posibilidadnan di por yuda nan pashentnan. E criterianan aki tambe ta un expresion di desconfiansa den direccion di e dokternan di cas dor di AZV.

Cuido di  pashentnan na Aruba cu mester por conta riba e prome linea di cuido di dokternan di cas lo por bay hopi atras mes. Intencion ta pa e medidanan aki di cortamento di remedi wordo presenta dor di Gabinete Wever Croes na Parlamento den algun dia.