AZV a informa un rato pasa cu a termina e contract cu “ortodontista” A. Kawaiah pa motibo cu e no a haya Decreto Ministerial nobo pa por sigui traha na Aruba. E intencion ta cu entrante 1 di juli tin un ortodontista nobo, den persona di Jesús Enrique Gualdrón Escalona. E ta un ortodontista cu a specialisa na Universdad El Bosque na Bogotá. E tin 39 aña di edad y ta domina nos idioma Papiamento.
Lo traspasa tur aseguradonan di AZV cu tabata cerca Dr. A. Kawaiah (cu machtiging valido) pa servicio cerca dje. Lo informa nan riba corto plazo con e traspaso di Dr. Kawaiah pa Dr. Gualdrón lo tuma luga. Dr Gualdrón Escalona ta bay traha na Vital OMS Dental Clinic NV. na Boegoeroei 49B (banda di SaveMore), cu ta e clinica di dentista (y alabes parlamentario) Arthur Vallejo.
Mientrastanto Abdal Kawaiah ta sigui deteni na ward’i polis, pendiente pa present’e mañan dilanti hues-comisario pa evalua si ta prolong’e of no. Entretanto Ministerio Publico a confirma na nos cu e acusacion contra dje ta di a practica tratamento medico como un ortodontista sin cu e ta autorisa pa haci tal. Esaki specialmente despues cu dia 2 di juni ultimo, AZV a kibra contract cu ne door cu Gobierno a opta pa no dun’e permiso mas pa por brinda cuido mas na Aruba. Ironia ta cu e mesun DVG cu e ultimo añanan SI a dun’e permiso pa traha y a “viseer” su diplomanan, awor diripiente a lanta fo’i soño y a realisa cu tur tempo e “dokter” tabata traha ilegalmente na Aruba! Como cu Inspeccion di Salubridad Publico di Aruba (IVA) a prohibi e dentista di sigui traha y el a mustra nan cu e no ta respeta y ta sigui toch, a opta pa keh’e na husticia cu awor a bay over na su detencion y encarcelacion.
Ironico ta cu awe AZV ta anuncia cu otro siman, dia 1 di juli lo tin un ortodontista nobo den servicio, pa reemplasa Kawaiah. Y cu e dentista lo establece su mes hunto cu dentista Arthur Vallejo na Boegoeroei, siendo cu e mesun Vallejo no mas cu ayera a sali critica AZV pisa pa su maneho cu dentistanan riba nos isla. E echo cu Arthur Vallejo ta un parlamentario di e gobierno na mando sin duda ta causa hopi pregunta den comunidad awor riba con transparente e decision tabata ora di busca un reemplasanta pa dentista Kawaiah.
