AZV: Ta preparando pa reemplaso di dokternan di cas

Pa tur asegurado di AZV inscribi na dokter Huub Pieterse y Marjorie Pieterse-Clements, pa asina nan por ricibi cuido medico, a regla un traspaso automatico.

Pa e siguiente dos lunanan, tur pashent di dokter Marjorie Pieterse-Clements, lo haya servicio medico via oficina di dokter di cas Aury Wever. Aki ta unda cu den luna di augustus y september lo tin un dokter di cas pa brinda servicio na e grupo di pashent cu tabata inscribi cerca dr. Marjorie Pieterse-Clements.

Ta haci uzo e ora di e localidad di dokter Aury Wever situa den Caya Ernesto Petronia 74, pero e dokter di cas lo tin su propio oficina eynan. Number di telefon ta 5857521 y number di emergencia ta 5628186.

Pa loke ta e pashentnan di dokter Huub Pieterse, nan lo haya servicio via e oficina di dokter di cas Priscella Tjon-Kon-Sang, situa den Katoenstraat 1. E prome siman di augustus dokter di cas Tjon-Kon-Sang y dokter B. Britt-Croes lo brinda servicio. Dia 9 di augustus un dokter di cas lo bin fo’i Hulanda. Aki tambe ta conta cu e dokter di cas lo tin su mes oficina den e localidad. Number di telefon ta 5660266 y number di emergencia ta 5660260.

Despues di e dos lunanan aki, entrante dia 1 di october HOED lo cuminsa (Dokter di cas bao di un dak). Mas informacion riba e localidad exacto di esaki lo ta publica despues ora cu tur cos ta cla.

Pa loke ta e pashentnan inscribi cerca dokter di cas Orlay Gonzalez-Diaz, nan lo pasa automaticamente pa dokter di cas Dennis Rasmijn, kende lo brinda servicio for di su praktijk ubica na Bubali 72F.

Dokter di cas Dennis Rasmijn ta un dokter Arubiano di 34 aña. Su trayectorio escolar el a pasa na Aruba y despues a bay studia medicina general na Rijksuniversiteit Groningen. El a obtene su Bachelor’s y su Master’s pa despues dicidi di bin bek Aruba.

Aki dokter Dennis Rasmijn su pasion a crece mas ainda y a scoge pa haci huisartsopleiding na Aruba mes. Dokter Rasmijn tin bon dominio di Papiamento, Hulandes, Ingles y Spaño.

AZV ta gradici e dokternan di cas saliente y ta yama e dokternan di cas nobo un bon bini.

AZV cu anuncio riba dokternan di cas

Posted by 24ora on Thursday, July 29, 2021