Local

AZV: Lo sigui corta den gastonan di cuido e aña’ki

19 January, 2021, 10:24 am

Tur esnan den cuido a pidi AZV claridad di kico ta bay ta e presupuesto pa aña 2021 pa loke ta e reduccionnan. E contesta a yega: Tur cos ta keda mescos. Lo sigui cu reduccionnan te proximo aviso.

Den e carta firma pa e director ir. Edwin jacobs, ta recorda cu na juli di aña pasa nan a haya e ordo pa baha gastonan cu 5.5% den tarifanan y presupuestonan. Y ta mustra riba e hecho cu e ordo ey no a bini cu un “einddatum”. Pues no tin un dia unda e reduccion aki ta bay vence.

Pero tambe AZV ta informa tur esnan cu ta brinda servicio den sector di cuido, cu for di tempo cu e “aainwijzing” a yega, a haci diferente intento, for di tur skina di cuido, pa evita e reduccionnan di gasto aki den 2021. “No ta conoci si e intentonan aki ta bay duna resultado. Minister di Turismo, Salud y Deporte reciente e bolbe manda un carta pa CAft, cu un ultimo intento pa baha e suma pidi di reduccion. Esaki ta motibo cu UO (Uitvoerings Orgaan di AZV) no por a contesta mas tempran esnan den cuido riba kico lo bay pasa den 2021.”

Pero basa riba e “aanwijzing” di minister di aña pasa y e situacion financiero precario persistente di pais Aruba, UO no tin otro escogencia cu sigui cu e reduccion ya implementa.

Un biaha mas ta splica esnan den cuido cu e situacion ta sigui manera aña pasa, un reduccion di 5.5% riba presupuestonan y si ta necesario, un maximo di blafon pa tratamento di 5.5%. Riba tur declaracion, lo kita 5.5%.

Pa finalisa, Jacobs ta bisa cu UO ta consciente cu esaki ta trece sacrificionan cu ne pa esnan cu ta brinda servicio den sector di cuido. “Si den e proximo siman- of lunanan tin desaroyo nobo cu ta haci adaptacionnan posibel of necesario, UO lo bay di biaha den consulta cu boso tur pa haci e adaptacionna necesario.”