AZV ta bay tin su Aruba Health Fair diasabra awo

Diasabra awo, dia 8 di Juni, AZV ta organisando nan prome Aruba Health Fair. Den e Health Fair aki, Departamento di Salud Publico tambe ta bay tey presente cu tres seccion.

Durante un conferencia di prensa, Jerusha Arends, hefe di e departamento financiero di AZV, a conta cu Aruba Health Fair ta bay tuma luga den e edificio di AZV den Rumbastraat. E idea di e feria di salud aki ta pa por brinda mas hopi informacion posibel na e pueblo di Aruba riba tereno manera prevencion, diabetes, cuido di hospital, etc.

 

Pa esaki tin diferente tent. Tin por lo menos 80 stands te awor aki, caminda cu lo tin diferente fundacion cu ta bay duna informacion y presentacion pa asina pueblo di Aruba por ta un tiki mas informa riba tereno di salud.Tambe ta bay tin diferente tayer durante e actividad aki, unda cu ta bay tin personanan specialisa cu ta duna workshop y tur personanan cu asisti na e tayernan aki tin chens di haci pregunta.

Tin tambe varios specialista y dokter cu lo ta orador durante e atardi aki. Ta bay tin demostracionnan deportivo, ta bay tin bar y cushina bon surti. Pesey e nomber feria tambe. E idea ta pa trece tur cos cu tin di haber cu salud na Aruba y tambe internacionalmente. Ta bay tin hospitalnan cu ta uza pa cuido medico den exterior cu tambe ta bay tey.
E idea ta pa tur tey hunto riba un solo dia y asina pueblo di Aruba por haya e informacion completo.

Si bo tin pregunta y/of inkietud, esaki lo ta bay ta dia corecto pa bo ta presente y haci tur pregunta necesario.Entrada pa e Health Fair ta 5 florin. Tur mucha te cu 15 aña ta drenta gratis. Tin un app di Aruba Health Fair cu a crea, specialmente pa e actividad aki. Tur hende por bay riba nan celular y download e app aki. Ora cu bo download e app aki, bo ta bay haya acceso na henter e programa di e Health Fair. Bo por registra pa tur e workshopnan aki y pasa na AZV y cumpra bo ticket pa cindo florin.

Si bo no kier sali bay AZV, bo por registra riba e app y riba e dia aki tambe bo por paga na porta y drenta. Fuera di e registracion di e app, ta bay tin premionan atractivo, manera weekendstay na hotel, ticket pa bay vakantie. Download e app pa bo tin tur informacion y alabes chens pa gana un premio. Ta invita tur hende pa download e app di AZV, registra pa e Healthfair aki, busca bo temanan di interes y asina bo por forma parti di e Aruba Health Fair diasabra awo, for di 4’or di atardi pa 10’or di anochi, na e edificio di AZV den Rumbastraat 21.