Tur 12 di december mundo henter ta recorda e Dia Internacional di Cobertura Universal di Salud. Aki na Aruba no ta diferente. Un dia pa reflexiona riba nos seguro AZV y kico e ta nifica pa nos dushi pida baranca.
E prome añanan di Organo Ehecutivo AZV (OE AZV) ta wordo considera esnan mas turbulento unda tabata tin hopi discusion tocante e contractonan y hasta casonan den corte. Dentro di tur e ‘discusionnan’ aki tabata lubida e motibo principal pakico a institui AZV. Preparando pa e celebracion di tur pais cu tin un seguro cu cobertura universal pa su ciudadanonan, nos di OE AZV ta repasa e motibo principal pa cual a institui e seguro medico general pa Aruba.
1988
Tabata na aña 1988 (net 2 aña despues di Status Aparte) cu e idea a wordo treci den parlamento door di señor Charro Kelly. E situacion na Aruba e tempo ey tabata uno unda e poblacion tabata pasa duro ora cu malesa bati na porta. Algun hende tabata bon para cu un seguro medico di nan mes, otro tabata tin uno pa medio di nan trabou y otro no tabata tin nada of mester a keda satisfecho cu e servicio medico pa medio di e asina yama ‘ppk-kaart’ (=e caarchi di gobierno). E pensamento cu mester yuda e ciudadano ora e haya un malesa a wordo apoya y ya na 1992 esnan cu ta scirbi ley a prepara esaki y e ley AZV a wordo acepta unaninamente den parlamento.
1992-2001
Awor cu e ley AZV tabata scirbi, a tuma hopi aña pa e preparacion ‘practico’, esta cu mester a para keto na con ta bay realmente introduci e ley AZV. Diferente stakeholders a wordo envolvi manera e gremionan, e sindicatonan, e seguronan comercial y tur e dunadonan di cuido. E caminda tabata uno largo pero sigur. Na 2001 AZV a keda introduci. Un introduccion cu no a bay sin turbulencia sin embargo a keda mehora y desaroya e cuido medico. Awe 20 aña despues tin mucho mas specialismo y tratamentonan medico compara cu na inicio di AZV. Pa menciona algun cu den transcurso di e añanan a wordo introduci: e ampliacion di oncologia, e ampliacion di gyneacologia, a introduci dokter pa rehabilitacion, a trece dokternan di pulmon, a trece infectiologonan, a trece dokternan specialisa den cuido di hende grandi, a trece nefrologonan (specialista di malesanan di riñon), a habri e departamento di reumatologia na hospital y e introduccion di specialista di stoma, tripa y higra.
Kico mas AZV a percura p’e?
Cu e meta pa sigui bay dilanti y yuda Aruba, AZV ta percura pa traha cu specialistanan di afo tambe, kendenan regularmente ta yega nos isla pa duna e.o. conseho. Ta referi kinan na specialistanan manera cardiologo di mucha, medico microbiologo di Corsow, genetista clinico, epileptologo (neurologo specialisa den e malesa di epilepsia) y e schisisteam (team di specialista pa muchanan cu a nace cu un spleet den lip of spleet den cachete of den nan shelo di boca) di Hulanda. AZV ta sigui traha riba e desaroyo di cuido medico di calidad pa Aruba.
2021
Pakico duna AZV importancia? Ban wak den mundo. Varios pais ta bringando pa haya un sistema manera AZV, e asina yama ‘universal health coverage’. Aruba ta haya e oportunidad pa para keto y reflexiona…pakico e paisnan kier un AZV? Paso a wordo comproba cu no tin nada mas bon cu un pais ofrece su pueblo un seguro medico general. E ta trece accesibilidad di cuido medico pa tur y ta hisa e calidad di bida di e poblacion. Na Aruba danki na introduccion di AZV e hende muhe y hende homber ta biba mas largo.
Situacion actual y futuro
E pandemia di coronavirus a dal mundo duro y Aruba tambe. E bon noticia ta cu OE AZV a carga e gastonan di coronavirus. E realidad ta si cu Aruba mester bay cumpli cu e Landspakket Hulanda-Aruba. Ta premira cu hasta despues cu OE AZV cumpli cu reforma di e sector medico, hasta e ora ey Aruba ta keda bendiciona pa motibo di tin AZV como e seguro medico garantisa pa tur.
