Diahuebs rond mundo a celebra Universal Health Coverage Day. Y den cuadro di esaki AZV tampoco no a keda atras y tabata tin un celebracion. WHO a anuncia cu e dia aki ta pa observa cuido medico pa tur hende y esey ta rond mundo.
Como AZV, ta e ehempel pa Universal Health Care. Tur ciudadano di Aruba ta cubri pa AZV. Hopi otro pais no tin esey. Lo ta un bon idea tambe pa celebra e dia y para keto un rato kico esey ta nifica.
Logo y app
Den e mesun celebracion aki a dicidi cu lo ta un bon momento pa lansa nan logo nobo. E logo nobo ta simbolisa e conectividad cu nos pais, cu nos hendenan, cu nos comunidad. E ta simbolisa e pilarnan cu tin, esta e tres pilarnan di AZV, cual ta calidad, accesibilidad y gasto. Tin e tres pilarnan ancra den e logo y e colornan di cuido y sostenibilidad.
AZV ta hopi contento cu esey.
Tambe nan a lansa nan AZV app. Segun Goedhoop, un aña pasa no tabata tin ningun app y diahuebs anochi a lansa nan di tres app. E app aki ta uno di berdad. Awor aki e zorgpas cu tur hende tin, esey a keda embedded den e app nobo di AZV. Ta un paso grandi pa nan.
E aña cu ta bin nan ta expande e funcionabilidad di e app. Mas grandi ainda, cu e lo bira un app cu por comunica cu e clientenan, cu e dunadonan di cuido y diahuebs tabata e lansamento di esaki.
Contacto cu stakeholdernan
AZV ta traha hopi di cerca cu hospital y Imsan. Tin biaha ta diferencia di opinion. Pero na fin di dia nan tin e mesun meta. Nan kier e miho calidad, e miho accesibilidad di cuido pa e pashentnan riba gastonan aceptabel.
Por a ripara cu durante aña e relacion ey ta bira mas y mas miho. Ta compronde otro mas miho. Hunto, den futuro tin un hospital, tin un AZV y tin cu traha hunto pa beneficia e pais. Cu un hospital, un Imsan, un Respaldo, e relacion ta birando mas miho. AZV ta compronde nan rol y e instancianan aki ta compronde e rol di AZV. Esey ta e yabi pa berdaderamente bin cu iniciativanan conhuntamente pa beneficia e cuido na Aruba.
Con 2019 a bay
Por a mira 2019 como un aña toch basta dinamico, basta turbulento tambe. Tur hende por corda e problemanan di hospital y oncologia. Awor aki naturalmente e sistema ta down. Esey no ta nada bon. Na e mesun momento a mira hopi cos positivo tambe.
Por fin, hunto cu hospital, ta bezig pa traha un acuerdo na unda nan enfoke ta pa otro aña, cual ta un paso hopi grandi, cu basicamente ta cambia e manera con ta traha hunto. Ta mira tambe den nan propio organisacion un mindset change mas cerca di pueblo, cu e app, e comunicacion cu pueblo via Facebook, etc. Por a ripara tambe cu hendenan tin nan mesun pensamento kico AZV ta of kico e no ta, kico tin derecho riba dje, etc. Esey ta nifica cu AZV mester haci un miho trabao pa splica kico AZV ta brinda, kico nan ta bezig cun’e pa otro aña. AZV ta sigui cu prevencion, nan ta sigui cu comunicacion cu comunidad y ta sigui pa mehora cu e partnernan pa na fin di dia pa hasta tin un miho cuido medico na Aruba.
