Manera ta custumber, prome cu kima “MOMITO” e prins y pancho infantil y hubenil ta lesa e testament cu a keda atras. Claro cu ta carga e speransa cu lo haci algo cu tur e sugerencianan, ideanan y critica cu tin relaciona cu organisacion di carnaval. Asina a bay tempo di SAC y a sigui bou maneho di SMAC tambe.
“Carnaval Carnaval, ay ki dushi ta Carnaval. Awe ami MOMITO, e yui mas inteligente di Rey Momo, primo di e reinanan, omo di nos prins cu panchonan, Rey di caminda, ta cla pa duna su testament pa Carnaval 69. Aki mi kier a duna algun punto cu mi ta desea pa nos traha riba dje pa hunto nos crece un biaha mas e Carnaval di nos muchanan.
Carnaval ta bida
E mesun bida aki Momito ta desea di mira bek den nos Parada di Muchanan, nan inocencia, nan sonrisa, nan alegria mester ta nos motivacion di cada dia. Carnaval ta goso y divercion, ta momento pa nos tuma accion pa duna Carnaval di Mucha proteccion.
Harimento ta parti di bida
Momito ta desea di mira mas participacion di Prins cu Pancho. San nicolaas, Savaneta, Noord, Dakota y hasta for di Rancho. Na docentenan mi kier a pidi boso pa motiva nos muchanan, ban trece e arte di conta chasco bek, e ta algo masha pret.
Participacion ta yena tur nos cu emocion
Momito su curason lo ta yena di felicidad si otro aña mas reina competi. Scolnan, Club, Centro di Bario y Fundacion, ban traha hunto pa yega na un solucion. Nos tin hopi hende talentoso y cu ta haci cu e participacion no mester ta mucho costoso.
Shon Kriticonchi tin hopi…Think Twice before your click
Hopi critica Momito a lesa y scucha e aña aki. Esaki ta haci Momito su curason bira tristo y chikito. En bes di sinta critica un ta mas miho lora manga y cuminsa aporta na nos celebracion. Ban uni como un gran nacion pa sigui mustra mundo con nos ta sigui cu nos tradicion. Yuda y duna bo aporte nan nos futuro generacion.
Musica ta alegria
Momito ta contento y a baila masha hopi riba e musica di nos tumberitonan y tambe nos Calypso y Roadmarch. Mi a baila e Baby Smoke Stoke, Mi a Break Away na ordo y mi a corda semper cu The Show Must Go On y rato rato ora mi pianan a cansa poco, mi a yama 911. Ora e tumba dushi a dal mi, mi a subi e Trein di Ambiente y mi a sinti mi den Salon di Fama. Muchanan sigui canta y engradece nos Carnaval.
Un conseho semper ta na su lugar
Na Mami y Papi un peticion di curason, Momito ta desea pa pidi boso duna mas atencion ora di tuma un decision. Momito so wowonan a bira cuadra di mira muchanan den Jouve. NO POR. Sin proteccion di orea…ROBES! Sin proteccion conrta solo…Ta KICO TA PASA DEN BO CABES. Nan mester awa pa hidrata nan mes. Nos muchanan tin derecho riba cuido y proteccion, abo como mayor please tuma e miho accion.
Educacion parti fundamental di nos nos desaroyo
Un movemento positivo cu Momito a tuma nota di dje ta e jump up nan escolar den bario cual ta duna nos muchanan e oportunidad di por diberti y tambe jump den un parada. Mi kier a motiva e scolnan pa sigui haci esakinan. Lo ta great pa Carnaval 70 mas scol uni hunto y asina por join tambe e paradanan principal di Carnaval.
Carnaval ta di Aruba, tur bario uni pa Carnaval por sigui crece
Momito ta felicita na e team di Noord cu aña aden aña afo ta lucha pa nan parada sigui, cu nan eleccion di reina y cu nan participacion activo den nos Carnaval, esaki ta un bon ehempel pa otro districtonan na Aruba, nos por haci nos Carnaval e fiesta mas grandi di pueblo.
Mehoracion ta e clave di superacion
Momito ta consciente cu tin cosnan pa mehora, ya caba mi a laga mi lista atras pa Mr. Cocoliso (Ay Dios, no ta Prins cu Pancho esaki ta). Mi kiermen cu Mr. Darren van Ommeren, pa asina hunto cu e team di SMAC pa traha pa nos Carnaval di Mucha por sigui engrandece.
Na tur nos muchanan y hobennan, auke Momito ta bay, corda sigui representa Carnaval durante henter e aña, unda cu boso bay, corda saca cara di nos nos muchanan y hobennan. Dyshell, Aiden, Lucas, Shaqion, Ziah Amalia, Jennely, Carl Anthony, Caylee, Carl Jr, Zenae y Jorienne y tur participante… Danki pa boso presentacion radiante, mi ta desea boso un mundo briyante.
Mi sa cu pronto mi ta wordo kima pero mi ta bay laga boso cu e promesa cu otro aña lo mi renace atrobe manera un Ave Phoenix pa ta e guia y protector di nos mucha y hobennan. Danki na tur esunnan cu a traha pa nos Carnaval.
SMAC cu ta e organisado principal, Shon Polis, Ambulance, Cuido di Emergencia, Musico, Decorado, Costurera, tur persona cu ta yuda den e celebracion aki. Ban traha den union pa Carnaval 70, unda nos lo hisa benta y nos lo sigui celebra teniendo nos muchanan bon na cuenta.
Un saludo Carnavalesco…Boso dushi di Carnaval, MOMITO.
