Un homber, Luis Maduro, kende den pasado haya su mes envolvi cu husticia pa un caso di asesinato pa cual a conden’e na 15 aña, awo tabata den Corte pero como victima. Pa un delito casi igual, esta intento di asesinato. Su suerte ta cu el a keda na bida, locual no por bisa di esun cu tabata su victima mas cu 15 aña pasa.
Ministerio Publico (OM) a acusa Ray Hernandez di intento di asesinato y posesion di un arma di candela, hechonan cu a tuma luga dia 17 di november, 2018, dilanti su apartamento den Caya Juancho Kock na Dakota. Durante tratamento di e caso, Hernandez a bisa Hues wak e record di e victima y wak esun di dje, ya cu nunca prome cu e hecho aki el a yega di haya su mes envolvi cu husticia. Esaki lo demostra cu e motibo cu el a haya su mes den problema cu husticia ta cu e tabata bou presion y miedo di kico Maduro por haci contra dje y su famia.
Tur problema ta draai rond di un scooter cu e acusado a haya for di Maduro pa bende, ora cu el a biaha bay Hulanda. Segun Hernandez, el a paga e suma completo pero Maduro ta bisa cu e falta pa haya 3500 florin. Y esaki e tabata keda insisti pa Hernandez pague.
Debi na menasa contra dje y su famia, entre otro di morto, a haci cu Hernandez mester a bay keda na cas di un famia y despues un siman na hotel. Y den e periodo aki, net ora cu el a bolbe di un biahe pa Hulanda, el a dicidi di cumpra un arma di candela. Esey a sosode ora cu Maduro a laga un mensahe atras cu su swa bisando cu e tin un bala cu su nomber marca riba dje p’e.
Net dia el a sali di hotel y bay na su apartamento na Dakota, Maduro den oranan di anochi a presenta na su cas. Aki un biaha mas tabatin un discusion, y menasa di morto a cay. Maduro ta nenga, pero tin declaracionnan cu ta bisa cu el a expresa cu e ta bay cas busca arma pa tira Hernandez mata. Pero prome cu e por a haci esey, Hernandez kende a bisa cu Maduro den pasado caba a hay’e envolvi cu husticia pa asesinato, a dicidi di pasa man cu e arma, bay afo y a los tres tiro. “E prome tiro mi no tabata sa mes, mi no a ni scuch’e sino te ora cu mi a mira un mancha di sanger na mi pecho. Despues si mi a tende dos tiro mas,” e victima Luis Maduro a declara na Polis.
E acusado ta bisa cu e conoce Maduro como un persona peligroso y cu ta busca problema tur caminda. E y su fama a ricibi varios menasa di dje y ora cu e tabata cera ainda Maduro a bay menasa un amigo. Pa e caso aki Maduro mester a presenta dilanti Hues na inicio di september ultimo. Pues despues di e sucedido na november, 2018, e problema cu Maduro no a caba, segun e acusado. Y dia di e sucedido, e no a pensa racional ora cu Maduro a bisa cu e ta bay cu un arma a bin mat’e, y el a dicidi di los e tironan prome cu e ricibi tiro.
Despues e acusado mes a entrega su mes na Polis y a mustra e Polisnan unda e revolver tabata scondi. E tabatin 5 bala di cual a uza 3.
Pa e caso aki a laga traha rapport di psychiater, cu a conclui cu e acusado tabata hopi emocional y e dia di e sucedido a perde cabes. Den e situacion cu e tabata aden, e tabata un tiki menos responsabel pa su actonan, door cu e tabatin miedo pa e tantisimo menasanan cu e homber a lansa contra dje.
Daño
Maduro ta bisa cu e tironan cu a alcansa a lague mancaron, pues cu e no por traha. Supuestamente e tabata traha den construccion na momento di e sucedido, pero e no por a produci un payslip di esaki. Awo el a dicidi di demanda e acusado pa e hecho cu e no por traha pa cria su yiu cu loke cu e tin awor ta onderstand di handicap cu ta un tiki mas cu 900 florin.
Hues a hacie varios pregunta, el a bisa cu e no por haci ningun trabou pisa mas, ya cu e balanan cu el a haya a causa cu lesion na su pulmon, schouder y pecho; e mester a wordo opera mas cu un biaha y ainda e ta haya terapia pa motibo cu e no por hisa su brasa full na halto. Den construccion por lo menos e no por traha y ningun otro trabou pisa, ya cu e no por hala rosea bon tampoco. Pa tur e motibonan aki el a pidi un suma di 50 florin florin pa daño material y inmaterial. “Mi cliente no por traha mas; el a wordo afgekeurd y e tin un yiu pa cria,” e abogado di Maduro, mr. Zara, a bisa Huez. El a agrega cu e balanan a bira su pulmon, a haya dos buraco den stoma y schouder y man drechi no a keda bon. (Nota di Redaccion: na salida di sala, el a saca su brasa y man drechi pa bati riba schouder di un guardia ora cu el a salud’e).
Fiscal di su banda a splica cu normalmente pa casonan di intento di asesinato ta pidi un castigo di 8 aña. Pero den e caso aki a tene cuenta cu Maduro mes tabata persigui e acusado, lansando varios menasa, pero cu e por a soluciona e problema di otro forma en bes di bay cumpra un arma di candela. Y tambe a tene cuenta cu e tabatin un carchi castigo limpi, nunca el a haye envolvi cu husticia, mientras cu Maduro su carchi di castigo ta mustra cu e ta un persona peligroso. A pidi Corte pa impone seis aña di prizon.
E demanda pa daño y perhuicio den e caso aki ta un poco complica, principalmente pasobra tin hopi pregunta sin contesta: e victima por traha of no por traha atl all? Si e por traha, ki tipo di trabou? Ki tempo e por cuminsa traha; no tin prueba concreto cu e tabata trahando na momento di e sucedido. Pa tur e motibonan aki a pidi pa declara e demanda no admisibel. Semper e por cuminsa un caso civil ainda.
Dia 25 di october pa 8.15 lo tin sentencia den e caso aki.
Maduro a haya su mes den un problema na un fiesta banda di Talk of The Town mas cu 15 aña pasa. El a saca un arma y e bala a alcansa un mucha muhe cu no tabatin nada di haber cu e problemanan andando.
