Mi a tende di Lisa Wong cu su tata Kit Ying Wong a fayece na New Jersey september 7 na edad di 89 aña. Tempu cu Kit Yin Wong a crece na Aruba e tabata conoci como “Ayang” y e tabata biba na Lagoenweg, un poco pariba di e brug cu ta conecta Zoutmanstraat cu Julianastraat, mas o menos 200 meter pariba di caminda ami tabata biba.
Ayang su famia tabata e doñonan di Paris Restaurant na Oranjestad y di Chesterfield Restaurant na San Niciolas. Ayang a asisti St. Dominicus College y e tawata un padvinder cu e grupo St. Franciscus tempo cu Chomi Laclé, un gran futbolista di Aruba, tabata Hopman. Su coleganan na scol ta corda Ayang como un studiante briyante y un scout pasiona, masha agil. Ami mes ta corda Ayang como un mucha homber cu semper tabata den bon beis y tur hende cu tabata conoce tabata apreci’e.
Despues di gradua na St. Dominicus College el a bay studia na Merca y el a obtene su diploma di inginiero na e prestigioso Lehigh University. El keda biba na Merca caminda e tabatin un carrera exitoso. Su dos yiu hombernan a bira dokter di wowo cu clinica na varios lugar den New Jersey. Lisa, su unico yiu muher ta un realtor exitoso na New York.
Aunke Ayang tabata bin Aruba regularmente, nos no a topa otro te tres aña pasa cu Ayang a bin pasa vacantie aki cu su yiu Lisa. Despues di setenta aña e dos exLagoenero a topa otro atrobe.
Disfrutando di un desayuno Hulandes na Dutch Pancake House, nos a combersa, recorda y intercambia noticianan di nos famianan durante casi dos ora. Mi a presenta un copia di mi buki “Storianan Di Un Mucha Di Lagoen” cu a wordo publica un poco tempo prome. E buki ta contene un cantidad di potret cu a pone Ayang corda riba su hubentud. Mi a goza e potretnan cu Lisa a trece di e miembronan di e famia di Ayang cu ami no tabata conoce.
Mi tabata spera di mira Ayang atrobe, pero destino no a permitimi. Dos aña pasa Ayang a accidenta y kibra un weso di lomba y no a recupera mas. Despues di hopi trauma, Ayang a bay sosega. El a bay laga su señora cu kende el a comparti 67 aña di su bida, tres yiu y tres nieto. Ayang a wordo crema y probablemente Lisa lo plama su shinishinan aki na Aruba.
Mi condolencianan ta bay pa tur su famianan, pero en especial pa Lisa cu a impresiona mi cu su amor profundo pa su tata. Cu Ayang haya descanso eterno.
Skirbi pa Clyde Harms
