Awor si parce Hamaka a haya permiso y por construi legalmente su dak tan anhela

Despues cu Guarda Nos Costa a gara muher ilegal trahando na Hamaka, despues cu DOW a instrui pa desmantela construccion ilegal na Hamaka, awor si parce e huurdo a logra regla pa traha e dak tan anhela na Hamaka. E huurdo ta huur e localidad for di Gobierno. E localidad aki ta wordo maneha pa e huurdo pero e mes no mag di construi. Asina mes a construi den forma ilegal. No a pidi permiso pa construi. Durante construccion hasta a causa daño riba Linear Park. Ora DOW a dune ordo pa kita tur cos, e no a hacie mesora. A purba tog pa roga su amigo minister pa instrui DOW pa laga cos para keto. E cos tabata cayente y minister mester a dobla.
Mientrastanto no ta desmantela tur cos. A laga e stakanan den tera unda a kibra parti di Linear Park pa por a pone e stakanan. A pasa algun luna y awor si a logra convence e minister pa DOW y DIP duna ok pa construi. Legalmente ta e doño cu ta e departamento di Gobierno mester haci e trabou. Awor e huurdo ta haci loke cu e kier. No ta conoci si DOW a keur goed e cambionan pa construccion. E bon di esaki ta cu awor cu e minister a dobla pa Hamaka, ta habri caminda pa e otronan tambe riba mesun strip. Nan tambe por haci mesun cambio of adapta e Kiosco cu nan tambe a huur. No por descrimina. Riba e fotonan por mira cu e trabounan a cuminsa y pa e weekend aki e clientenan por sinta bou dak manera e huurdo of manehador tabata desea.
Den e dianan aki lo bay splica si con e forma di traha ta di e minister. Con el a usa DOW pa traha cartanan pa bringa otro huurdo na Beach y ora e Huurdo aki a perde su caso, a desmantela su contruccion. Asina cu el a desmantela, e minister a instrui DOW pa bay papia cu e otronan cu tambe a manda carta pa settle cu nan y adapta nan precario pa acomoda loke nan a construi contra ley. Kiermen e minister ta selectivo y ta mal usa DOW pa bringa hendenan cu e ta contra nan. Ora cu e logra su meta ta instrui pa DOW of DIP acomoda esnan cu ta alabe of ta bon cune. Den e dianan aki lo amplia riba esaki.