Conseho di Minister a aproba nombracion di Alto Comisario interino Andrew Hoo, como Alto Comisario permanente. E ta ocupando e puesto di Alto Comisario interino di Cuerpo Policial desde april 2018. Hunto cu Ministerio di Husticia y Departamento di Recurso Humano a logra optimalisa e ciclo di promocionnan (bevordering) y reconocimentonan, cual varios tabata pendiente pa hopi aña. E maneho nobo aki ta dunando bon resultado y promocionnan den Polis ta sali mas lihe, tur cu e sosten y bou guia di e Alto Comisario nobo.
Desde cu a restitui e poder di control di ley di LTU na 2018 pa ful Cuerpo Policial uniforma, bou mando di Alto Comisario Hoo esaki a resulta un exito den control y combatimento di permanencia di personanan cu no tin permiso pa ta riba nos isla. Durante su periodo como Alto Comisario, Andrew Hoo a sa di gana e respet y establece bon contacto di trabou cu agencianan Hudicial di Merca, e mercado principal di nos bishitantenan turistico.
Tin varios otro proceso positivo andando, manera entre otro mudamento di varios departamento pa un compleho mas grandi y adecua na Wayaca, un cantidad substancial di motorcycle nobo pa e motor unit, un propio radar pa KPA, cualnan, entre otro den bon comunicashon y consulta cu sindicato SPA, lo sigui adelanta pa bienestar general di KPA y nos isla.
Tocante Andrew Hoo
Andrew Hoo tin un trayectoria largo den husticia. El a cuminsa den Cuerpo Policial Aruba na aña 2001 pues e tin un diploma MBO Politieopleiding niv. 4, Politie Academie te Appeldoorn, Bachelor Of Science Hotel Administration, Associate of Science Hotel Management y Executive Master of Tactical Policing Major in General Leadership. Andrew Hoo ta un persona profesional y dedica na su trabou. E ta casa y tin dos yui.
Despues di a bay forma parti di e famia di Marriott Hotel Aruba como Complex Director of Loss Prevention and Risk Management, el a bolbe su cas bek na unda el a sirbi su pais cu honor y pasion pero e biaha aki e ta cla pa fungi den e posicion di Korpchef di Cuerpo Policial Aruba. Un persona cu conocemento amplio den e parti hudicial, industria di turismo y seguridad.
Proceso largo di reclutacion
Ministro di Husticia mr. Andin Bikker a gradici e Comishon di conseho cu a hiba e proceso di solicitud pa Alto Comisario. Tambe e Minister ta gradici tur otro candidato cu a solicita, cada un cu nan propio excelencia di servicio y meritonan altamente aprecia, pa e interes demostra pa e funcion importante pa cu e siguridad di nos isla.
Minister Bikker ta felicita Andrew Hoo y nos Cuerpo Policial y ta gradici nan un bes mas pa e tremendo trabou di protehe nos comunidad y nos bishitantenan.