Awor ku e deal di PSB i APC a keda konkretisá, kiko ta bai pasa ku klientenan i trahadónan di Girobank

111

Manera ta ampliamente konosí dia 28 di mei último e traspas’é di e akshonnan di PSB pa APC Bank a tuma lugá eksitosamente konsiderando ku e trayekto pa atendé ku e situashon tantu komersial i di likides di PSB ta andando for di aña 2010 i porfin a yega na un final. Banda di e fakto ku nos ta konta ku APC Bank lo salbaguardiá e kuponan di trabou di trahadónan di PSB ku awor ta kai bou di APC Bank loke tambe ta mas importante pa nos ta ku nos tin un banko shen porshento lokal kaminda e divisanan generá lo keda aki na Kòrsou o sea lo tin mas plaka pa invertí den nos ekonomia esaki ta diferensiá di hopi otro banko aki na Kòrsou kaminda un parti hopi supstansial di nos divisanan ta bai afó di Kòrsou ya ku e bankonan no ta shen porshento lokal.

Pa loke ta trata e situashon bergonsoso i di hopi mal sabor di Girobank nos ke rekordá minister ku tantu den final di 2019 i durante e aña aki na diferente okashon tantu den reunionnan di Parlamento komo riba e diferente plataformanan di komunikashon kaminda minister a deklará ku Girobank lo keda atendé despues ku konkretisá e akuerdo di PSB i APC.

Nos ke enfatisá ku ta indispensabel pa yega na un solushon satisfaktorio i den un korto plaso. Alabes nos ta reiterá pa tur klaridat ku nos ta solidario ku tur esnan ku a konfia i depositá nan sèn na Girobank i tin e derechi di haña tur nan sèn bek. Tambe nos ke bolbe rekordá  minister ku pa nos e responsabelnan pa e ‘estafa monumental” di miónes di florin di klientenan aki, ku lamentablemente a tuma lugá bou di supervishon di Banko Sentral di Curaçao i Sint Maarten (CBSC), mester keda persiguí i kondena ku tur e peso di lei, esaki ounke Minister a yega di bisa ku no ta bai wak ta ken a kometé e eror pero ta dediká tempu pa buska solushon pa e asuntu aki. Sigur un akto noble di parti di minister pa en bèrdat pone prioridat pa buska e solushon. Sinembargo no por deskartá e forma iresponsabel i inhustu ku a trata ku maneho di plaka di siudadanonan i keda sin tene e personanan konserní ‘accountable’. Ta komo sifuera ku e echonan ku a kondusí na e problemanan aki no ta alkaso i despues lo wak kon pa den futuro esaki no ripití!

Si no atendé ku e falta di kòntròl i ku e falta di diligensia struktural aki e problemanan lo keda manifestá nan mes.

Ku e meta pa risibí e informashon korekto pa asina sigui haña mas klaridat di e totalidat nos ta hasi uso di artíkulo 96 di Reglamentu di Orden di Parlamento pa hasi minister e siguiente preguntanan:

  1. Minister por informá Parlamento e status di e negosiashonnan entre Girobank i APC Bank?
  2. Kiko ta e ròl di CBCS den e negosiashonnan aki?
  3. Kuantu tempu mas Girobank por keda den e situashon aktual sin un partner stratégiko?
  4. Empleadonan i klientenan ta keda debidamente informá riba e desaroyonan di Girobank?
  5. Kiko lo pasa ku e empleadonan di Girobank ora APC tuma esaki over?
  6. Kon gobièrnu tin pensá di drecha e falta di konfiansa i imágen negativo ku CBCS tin aktualmente den nos komunidat?
  7. Parlamento por risibí di gobièrnu e maneho konkreto kon gobièrnu lo evitá loke a pasa tantu na Ennia,Girobank i PSB no ripití ku otro institutonan finansiero ku ta kai bou di supervishon di CBCS? 
  8. Ministerio Públiko a informá Minister si entretantu tin  sospechosonan pa e aktonan froudulento ku a tuma lugá den Girobank?

Nos mester realisá i keda kòrda ku komo pais ku ta respetá su mes nos mester kuida e imágen i reputashon di nos entidatnan lokal. Maneho, kontrol i sanshon ta keda importante i ta keda nesesario ora kier traha riba solushonnan pa garantisá konfiabilidat i durabilidat den entre otro e sektornan ya menshoná i asina evitá pa e senarionan aktual ripití. Nos ta konta ku Minister lo kontesta nos preguntanan pronto konsiderando e alto grado di atenshon i akshon inmediato ku e situashon aki ta rekerí.