Douane a haci basta esfuerso pa loke ta e situacion di e barkitonan di Venezuela. Nan a reuni cu basta hende tambe. Segun director di Departamento di Douane, for di di Januari caba tabata tin e problema cu e presidente di Venezuela a cera e frontera y no tabata tin ningun comunicacion maritimo mas cu Aruba.
Pero despues di esey tabata tin diferente reunion cu a tuma luga. Poco poco a yega na acuerdonan cu Venezuela, unda cu a bin na stipula regla y cierto maneranan pa traha. A sinta na prome instante solamente cu Estado Falcon. Despues a sinta cu Boneiro y Corsou tambe. Y asina a yega na e acuerdonan pa por traha miho.
E ultimo tabata ora cu tabata tin e feria di La Virgen del Valle y ta custumber cu hopi yate di Aruba ta bay. Ultimo, dia 7 di September, nan a sali pa Venezuela y dia 6, mirando cu e yatenan tabata tin interes pa bay, e gobernador di estado Falcon mes tabata na Aruba, hunto cu su secretario di exportacion, hefe di puerto. Tabata tin tambe e hefe di aeropuerto hunto cun’e. A sinta y a yega na palabracionnan, cual tabata algo cu tabata den un grupo mas chikito, pero si a informa tur e stakeholdernan cu a yega na un acuerdo cu nan pa loke ta yate tambe.
Na prome instante e tabata solamente productonan di agricultura y tambe di pesca, pisca, fruta y berdura, cu a cuminsa yega y despues ta bay over pa e otro productonan. Finalmente, siman pasa, esta dia 6 ultimo, a sinta y a dicidi di yega na areglo tambe pa e yatenan por bay.
Acuerdonan
En principio tur cos ta cla, den e sentido cu a cuminsa acepta tambe otro productonan di Venezuela, pero tambe awor aki a logra cu e yatenan por bay y bin. Si a yega na e acuerdonan cu ta keda mantene e reglanan cu a traha pa e otro botonan tambe. E yatenan cu ta bay, lo tin cu klaar uit debidamente na Aruba, klaar in debidamente aya, klaar uit ora cu nan ta bin Aruba cerca instancianan oficial, pa asina por controla e documentonan tambe aki na Aruba.
Tin bon contacto cu Venezuela. Tin comunicacion directo cu e secretario di exportacion como tambe e capitania di puerto, cu ta duna Douane tur e documentonan cu nan tin mester y por verifica cu tur loke sali for di Venezuela ta sali corecto.
Kehonan
Hefe di Douane a splica cu tur cos tin di haber cu e controlnan necesario, pero tambe e ta pa proteccion di Aruba mes. Varios otro instancia ta haci nan control y e ta mas profundo. Por bisa cu den e instancianan cu tin cu haci e keuring di e material cu ta yega. Mayoria di cos cu ta bin Aruba ta pa consumo di e localnan mes. Naturalmente tin instancianan cu tin cu proteha e salud di nos hendenan, segun Ricky Croes.
