Si bo ta un persona curioso pa sa origen di nombernan di barionan aki na Aruba, anto mester lesa e buki di Vivienno Frank titula: “De oorsprong van Arubaanse Plaatsnamen, eindelijk onthuld”.

Siman pasa tabatin e ceremonia di bautismo di e buki aki na Biblioteca Nacional, cu tabata bon acudi. E autor mes ta sorprendi pa e interes grandi pa e buki, for di momento cu el a keda presenta.

Awo tin un buki cu origen di nombernan na Aruba di Vivienno Frank

Awo tin un buki cu origen di nombernan na Aruba di Vivienno Frank. Click e link pa mas https://24ora.tv/30JuUAn

Posted by 24ora on Saturday, July 20, 2019

Con e idea a nace

Algun tempo atras e yiu a aserca Vivienno Frank cu un blachi A4 cu algun nomber di luganan riba dje y di con e nombernan ey a surgi. “E papel a keda tur cora di datonan cu no tabatin.” E yiu e ora a encurash’e cu si e sa asina hopi, di con no skirbi un buki. Inicialmente Frank no kier a acepta pasobra e no kier bay den polemica cu e hendenan. Pero ta su mesun yiu atrobe a push’e bisand’e “si bo sa cu e informacionnan ey ta fout, e muchanan ta siña cos fout. Bo ta mes culpabel e ora cu esun cu a skirbi e papel ey.”
Ta hopi importante pa hoben y adultonan haya sa e berdadero origen di nomber di luganan. E autor a splica cu tin hopi nomber cu e hendenan a crea un mito of leyenda cu no ta cuadra cu realidad. Tin nomber a cambia asina hopi, cu e no ta nada cerca di e original mas. Por ehempel e nomber original segun publicatieblad no. 24 di 1866 ta Tanki Linder y no Tanki Lendert manera e ta wordo menciona awo. “Mi ta haya toch ta importante pa e generacion futuro sa con e nomber a nace, con nan a cambia y pakico nan a cambia,” e autor a bisa.

Aruba te ainda tin nomber cu ta netamente di e indjannan, manera Casibari. E ta bini di e idioma di e Arawaknan, cu tin, segun Unesco, tin 53 pa 59 diferente idioma di Arawaknan. Na Aruba, segun historia, tabata biba Caquetio, cual idioma a muri pasobra no ta haya nada skirbi di esaki. Aunke tin palabranan existente manera juwana, sabana, hamaka, cunuko, etc. Tur esaki a bini dilanti den e investigacion cu el a haci.
Asina tambe a sali na cla cu na aña 1515 a bay cu tur e Indjannan di Aruba, lagando e bieu y malonan atras, pa traha den minanan di oro y di koper, y den plantacion di caña na otro islanan di Caribe. Na 1527 ora cu e islanan a cay bou hurisdiccion di Venezuela, a trece algun Indjan pa pobla e islanan aki.
Asina e nombernan di Aruba a keda influencia.
E buki a tuma Vivienno Frank toch basta tempo, pa motibo cu e no ta linguista ni historiador y mester a haci hopi investigacion. “Loke mi haci mester ta perfecto,” el a bisa. Esnan interesa por tuma contacto cu e number 5933323.

Comments

comments