Tabata riba un dia manera awe asina, pero na aña 1985, cu a tuma luga e ultimo eleccion di Parlamento, como gobierno di transicion, pa forma e prome gobierno di pais Aruba, cu a drenta na vigor dia 1 di januari 1986. E eleccion ey tabata yena di sorpresa, incluyendo esun pa partido MEP cu a perde no menos di 5 asiento den un solo eleccion.
E eleccion ey tabata un di esunnan mas crucial di nos pais, pasobra Aruba tabata para na un crusada, casi similar, na esun cu nos ta para na dje awe na aña 2020. Refineria LAGO a caba di cera y Aruba ta drenta un Status Aparte di cual mester construi un pais for di nada. Tene cuenta cu LAGO tabata representa 50% di nos economia e tempo ey, pues tabata un sla hopi duro mes.
E resultado di eleccion tabata como lo siguiente;
- MEP a haya 13.786 voto, bon pa 8 asiento cu Betico Croes como votegetter cu 8.879 voto, pero cayendo cu 5 asiento for di 13 asiento cu nan tabatin.
- AVP a haya 11.480 voto, bon pa 7 asiento, cu Henny Eman como e di dos votegetter cu 5.107 voto personal.
- PPA a haya 4499 voto, bon pa 2 asiento
- PDA a haya 3661voto, bon pa 2 asiento
- ADN a haya 3216 voto, bon pa 2 asiento
Aunke MEP tabatin mas voto den e eleccion ey, toch nan no a logra forma Gobierno. Den cierto forma nan a sali “campeon sin corona”, pasobra aunke ainda nan tabatin mas voto, nan a cay cu 5 asiento, pues di 20.798 pa 13.786 voto den apenas dos aña di tempo. Parce cu pueblo tabata confundi y a duna sosten na AVP y a parti 6 asiento entre tres partido chikito, dunando cada un 2 asiento. E partidonan chikito a anuncia for di prome cu eleccion, di lo no kier traha cu MEP.
Asina tur partido a forma un coalicion y a laga MEP so den oposicion e tempo ey. Asina Aruba a haya su prome gabinete Eman cu a bin cu e plan di rescate pa pone Aruba bek riba pia economicamente.
Como cu eleccion a tuma luga dia 22 di november, a tuma como un luna pa por a forma e gobierno. Consecuentemente dia 23 di december 1985 a forma un Bestuurscollege pa mas o menos un siman di tempo. Nan tabata Diputadonan Watty Vos, Lenny Berlinski, Eddy Werleman, Charro Kelly, Hector Gonzales y Frans Wernet.
Anto un siman despues, dia 1 di januari 1986 e gobierno nobo a asumi poder, siendo un coalicion di Arubaanse Volkspartij (AVP), Partido Patriotico Arubano (PPA), Partido Democratico Arubano (PDA) y Accion Democratico Nacional (ADN). E prome Conseho di Minister di pais Aruba a bira Henny Eman como Minister Presidente, Armand Engelbrecht como Minister di Finansa, Mito Croes como Minister di Bienestar General, Watty Vos como Minister di Salud Publico y Husticia, Lenny Berlinski como Minister di Asuntonan Economico y Turismo, Benny Nisbet como Minister di Transporte y Comunicacion y Charro Kelly como Minister di Obranan Publico y Companianan Estatal.
Ta bon pa bisa cu tur tres partido chikito a haya reto cu nan ministernan y a baha nan prome cu ora. E prome tabata Lenny Berlinski di PDA, cu a saca afo na juli 1986 caba pa motibo di investigacion penal y a reemplas’e cu Don Mansur cu a bira “vakminister” di Asuntonan Economico y Turismo. Den partido PPA tambe a bin problema y e partido a split den PPA y PPN pa cual a baha Benny Nisbet como minister dia 24 di januari 1987 y a nombra Angel Bermudez como “vakminister” di Transporte y Comunicacion. Y partido ADN no a keda atras y nan a kibra den gobernacion y split den dos, den ADN y AD ’86 cu consecuencia cu Charro Kelly mester a baha na juli 1987 pa traha caminda pa Frank Booi cu a drenta como Minister di Obranan Publico pero representando AD’86.
Separa di ministernan, tambe nos isla a cera conoci cu dos Minister Plenipotenciario di Aruba, un na Hulanda y otro na Merca. Asina John Merryweather a bira e prome GevMin na Hulanda mientras cu despues a nombra Roy Wever, den representacion di AD’86 como GevMin na Washington, DC na Merca.
