Tur e trabou haci na grot di Divino Niño Hesus tabata e idea di Dufi Rasmijn (dfm), y y su yiunan cu a sigui cu e trabou te cu awendia. Un di e proyectonan cu semper nan ta organisa na fin di aña, ta iluminacion di e grot di Divino Niño Hesus na Weg Seroe Preto.

Segun Selfa Rasmijn Wernet, den combersacion cu 24ora.com, e shete yiunan di Dufi cu a keda na bida, y su nieto Gilbert Wernet, a dicidi di sigui cu e bunita obra aki, un trabou di boluntario cu nan ta haci cu hopi amor pa 19 aña largo.

Awe ta cende luz na grot Divino Niño de Hesus San Nicolas

Awe ta cende luz na grot Divino Niño de Hesus San Nicolas

Posted by 24ora on Tuesday, December 10, 2019

Nan ta logra crea un bunita iluminacion na e grot y tur riba nan propio esfuerso. Ta logra esaki por medio di benta di cuminda, cu no ta pa nan gasto personal of diverticion sino pa crea algo bunita cu e pueblo di Aruba por disfruta di dje.

Awo cu nan ta ehecutando e proyecto aki pa di 19 aña caba, nan ta haci un apelacion na cualkier comerciante cu kier duna un man pa yuda cu e luga ta mas bunita ilumina pa su celebracion di 20 aniversario cu ta tuma luga otro aña. Esaki ta un preparacion cu nan ta cuminsa for di awo.

Dufi Rasmijn a cuminsa of crea grot di Divino Niño Hesus, basa riba un promesa cu el a haci, despues cu su yiu a haya un accidente y a keda gravemente herida. “Nunca mi tata a kere den aparicion. E tabata bisa cu e ta kere den Dios pero no den aparicion. Pero dia cu mi ruman homber a haya accidente, despues cu nan a bise cu no tin mucho pa haci, el a sali for di hospital.

Riba e muraya pafo el a mira e imagen di Divino Niño Hesus. El a puntr’e kico el a bin haci, si ta pa hiba su yiu. El a sigui cana y ora cu el a bira pa wak, atrobe e ta mira e imagen riba e muraya di unda tabata PAAZ. Den su saco di carson el a haya un carchi di Divino Niño cu nunca e tabatin. Esey tabata algo hopi straño p’e.” Despues di e sucedido ey el a bisa su yiunan cu si e yiu malo recupera, e lo busca un Divino Niño y hink’e den un grot. Esey ta loke el a haci tambe.

No a haya gaita

Despues di cana e caminda legal, a haya e permiso necesario pa dedica e grot ey na Divino Niño y cu despues na fin di aña ta ilumina e atraccion aki pa fielnan. Tur aña nan tin un grupo cu yama Flor di Pasco ta toca gratis pa nan, pero e biaha’ki lamentablemente nan no por pasobra e señora ta basta malo.

Nan ta inaugura e luznan semper riba 10 di december, cu ta e fecha natal di Dufi Rasmijn, cu si e tabata na bida lo a cumpli 100 aña awe.

Un invitacion ta bay na pueblo pa acudi awe nochi. E bishitantenan por trece bela, pero no cerca di Divino Niño pa no causa daño na dje. Donacionnan ta bon bini y por combersa cu e organisadonan awe nochi

Comments

comments