Di un forma masha iresponsabel, Presidente di Parlamento, cu no tabata planea pa biaha e siman aki, a opta awe pa hunto cu Lider di Fraccion di MEP, subi avion pa bay Hulanda. Tur esaki mientras cu Vice Presidente Allan Howell (POR) ta na Panama den reunion di Parlatino. Ta parce cu mayoria di Conseho di Minister y varios Parlamentario lo bay Hulanda pa reunion y despues keda pa atende Aruba Dag riba diadomingo 25 di maart 2018.

Di acuerdo cu e forma di traha di Parlamento, ora e Presidente biaha, e Vice Presidente ta keda. Si e tampoco no tey, e ora un ex-Presidente ta keda. Den e caso aki tanto Mervin Wyatt como Marisol Lopez tambe ta afo. Despues di esey ta sigui e miembro cu mas aña den Parlamento, cu den e caso aki ta Benny Sevinger.

Probablemente e lo no yega na Presidi ningun reunion pasobra mayan e Vice Presidente ta yega Aruba. Ta e forma descabeya di lanta vuelo bay di e Presidente ta cuestionabel awor. Tambe pasobra cu tanto Parlamentario na Panama pa Parlatino y otronan cu ta bay Hulanda pa celebra Aruba Dag, no tin quorum na e momento aki tampoco.

De facto, tin cambio parce tambe den e reglamento di ordo cu por interpreta e falta di Presidencia di otro forma. Por ehempel, cu si mester yama un reunion awo, cu den dicho reunion ta core nombra un otro Presidente. Esey no ta e caso awo pasobra e Presidente no a baha, sino simplemente a biaha mientras e no por awe.

Nos a yama Herman Hek, Griffier di Parlamento, pero e no a contesta nos yamadanan pasobra e ta den reunion.

A tuma contacto cu Benny Sevinger di AVP y e no tabata sa mes cu Presidente a lanta bay laga Parlamento sin Presidente. El a bisa “Net bon, awo mi por yama un reunion mesora pa atende e asunto di baranan di oro”.

Benny Sevinger a participa pa prome biaha riba lista di AVP na aña 2001 y a haya 1493 voto, den eleccion na 2005 a logra 1403 voto, sigui pa eleccion na 2009 cu 2072 voto, den eleccion 2013 a haya 3932 y durante e ultimo eleccion na September 2017 a logra no menos di 2785 voto riba su nomber.

Comments

comments