Famia Real na Inglatera ta bou celebracion ya cu Reina Elizabeth II ta cumpli 94 aña di edad. Pero e biaha aki nan lo celebra esaki keto door di e lockdown di Coronavirus. Reina Elizabeth, e monarca di mas largo y bieu, normalmente ta celebra su cumpleaños priva y cu tiki publico, pero e aña aki ta celebr’e den silencio.
Tradicionalmente ta celebra aniversario y cumpleaños real cu un ceremonia cu “gun salute”, ta tira “blank rounds” den varios localidad rond London, pero e Reina a sinti cu e momento aki no ta apropia pa celebracion.
Normalmente pa señala e cumpleaños di Reina Elizabeth II, ta hisa bandera riba e edificionan. E unico reconocemento oficial di e famia Real a bin via Twitter, unda cu e Buckingham Palace a publica un pelicula di famia priva ora cu Reina Elizabeth II tabata mucha, hungando cu su difunto ruman chikito Margaret. E famia a desea Reina Elizabeth II feliz cumpleaños.
E Reina a pasa su dia na Windsor Castle, west di London, unda e ta pasando e lockdown hunto cu su casa Prins Philip di 98 aña. Di eynan el a manda hopi mensahe p’e nacion, incluyendo su di 5 aparicion na television den su 68 aña di reinado. Prins Philip a duna un declaracion, algo cu e no ta haci desde cu el a retira di publico 3 aña pasa, gradiciendo tur esnan envolvi den e lucha contra e crisis di Coronavirus.
Reina Elizabeth a nace dia 21 April 1926 na Bruton Street, central di London. Durante su crecemento e no a spera di bira Reina. Su tata, George VI, a tuma e trono ora cu su ruman mayor Edwart VIII a abdica na 1936 pa casa cu Wallis Simpson, un Mericano divorcia.
Na 1952 Elizabeth a bin na trono cu su 25 aña, y na september 2015 a surpasa su bisawela Reina Victoria como e monarca cu a reina mas largo na Inglatera. Luna pasa Buckingham Palace a bisa cu e parada pa celebra cumpleaños oficial di e Reina, cu ta tuma luga na juni, lo no tuma luga den su forma tradicional pa motibo di e restriccionnan durante eventonan social.
