Awe mainta 8:30am ta inicia e caso penal cu Minister di Husticia mr. Andin Bikker a ordena contra miembronan di prensa, pa por haya sa ken ta nan fuente den noticianan y coberturanan di suceso, pues casonan policial.

Henter e caso tin un tinte politico y awe defensa lo purba convence Hues cu esaki ta nada otro cu persecucion politico y cu Minister di Husticia a logra uza Ministerio Publico pa sacia sed di vengansa entre medionan di comunicacion pro y esunnan critico contra Gobierno. Abogado mr. Chris Lejuez tin defensa di Headlines Group, cas editorial di 24ora.com den su mannan.

Den e caso aki e sospechosonan ta nos coleganan Nelson “Speed” Andrade y Marko Espinoza. Tambe e Polis Kenneth Rasmijn ta un sospechoso y ta conta cu defensa di su abogado mr. Demis Illes. Ta premira cu e caso lo tuma por lo menos tres ora awe mainta pasobra abogadonan lo presenta un defensa pisa pa mustra con politicamente dirigi husticia ta funcionando na Aruba.

Ta acusa e dos periodistanan di verduistering, heling y di tap radio di Polis. Tur esaki siendo cu nunca a haya un radio di Polis na cas of den poder di ningun di e periodistanan aki. Unda si a haya radio a core yega na un “schikking” di 120 ora di trabou pa comunidad durante un “Tom Zitting” pues pafo di Corte.

Sociedad Interamericana de Prensa hunto cu e asosacion di periodistanan di Hulanda ta siguiendo e caso aki di cerca, pa por garantisa cu tin libertad di expresion y derecho di prensa liber riba nos isla. E forma con e proceso a bay di cera miembronan di prensa pa un problema den Cuerpo Policial Aruba ta insolito.

Imagina cu Polis falta algun radio, nunca niun hende a raporta cu a “horta” nan radio, pero a dicidi, riba ordo di Minister, pa Polis mes investiga nan mes pa radio cu nan mes a perde. Y den e caso aki awor kier acusa Prensa di nan mal administracion interno. Si tin radio di Polis perdi….no ta den Polis mes mester investiga y persigui?

Nos lo trece un reportahe amplio di e caso aki despues di su tratamento den Corte.

Comments

comments