Awe nos ta bay yama ayo na Carnaval 65. Un carnaval cu a resalta durante henter su temporada y cu ta culmina awe 3 di Maart 2019. E parada a cuminsa pa 10’or di mainta, saliendo for di Aruba Entertainment Center y ta caba na ex-edificio di DOW na e crusada di LG Smith Boulevard y Paardenbaaistraat.
Si e parada cana segun e agenda prepara dor di Stichting Maneho di Aruba su Carnaval (SMAC) y Cuerpo Policial Aruba, ta premira cu e rabo lo yega e punto final pa 8’or di anochi.
Polis y SMAC ta habri e parada di carnaval grandi na Oranjestad sigui pa Northstar Steelband cu 25 integrante y Family & Friends Steelband cu 25 integrante.
Despues lo tin e Opening Banner di SMAC y e banner di e proyecto special #CuidaBoOrea.
Rey Momo ta sigui, hunto cu e Reinanan, compaña pa Upgrade Music.
1. Empire Carnival Group ta habri e parada mes cu e tema Neon Party. Un total di 400 persona lo participa den e grupo, compaña pa Musical Time y Buleria.
2. Dushi Carnival Group ta sigui cu e tema Land of Dreams. Un total di 200 persona lo ta participando, compaña pa Madness.
3. TOB Carnival Group ta bin cu e tema Game of Thrones, cu un total di 1200 participante. Nan ta wordo compa±a pa N Fuzion.
4. Champagne Carnival Group ta bin cu e tema Kingdom of Ice, cu un total di 900 participante. Nan ta compaña pa Tsunami.
5. Unity Carnival Group ta sigui cu 100 participante. Nan ta compaña pa Hot Ones.
6. Los Laga Bai Carnival Group ta bin cu e tema Royalties of C65. Un total di 500 persona ta participando y Robert y su Solo Banda show ta compaña nan durante e ruta.
Despues di esey Quality Brassband ta entretene e publico cu ASAMBEHO, sigui pa
7. Majestic Carnival Group cu su Gods and Goddesses. Un total di 115 persona ta participando hunto cu BMW.
8. Pink for Life Carnival Group ta bin cu Coins on Fire, cu un total di 250 participante. Le Groove lo ta treciendo su ambiente.
9. OPC Carnival Group ta biniendo cu E mundo briyante di OPC, cu un total di 200 participante. OREO ta compaña e grupo cu su ritmo unico.
10. royal Carnival Group ta bin cu Cabaret Royale y tin un total di 150 persona. NBO ta compaña e grupo.
Despues di Royal Massive Brassband International lo zona e snaarnan pa e publico na banda.
11. Infinty Carnival Group hunto cu D’licious, ta bin cu Exotic Birds of the Caribbean. Un total di 350 persona ta participando den e grupo.
12. Soca Kingdom Carnival Group ta sigui cu su Warriors of the lost Gem. Nan ta compaña pa un DJ.
13. Steelband Korps Mariniers ta bin cu su musica.
14. Chelo Loco ta bin cu su Baile Tipico di Peru, cu 45 persona y compaña pa un DJ.
No perde e ultimo parada di Aruba su Carnaval 65. Asina ta, prepara bo stoel y bo drink y si bo ta bin di p’ariba di brug, sali tempran, pa asina bo tin bo spot pa bo disfruta en grande di e Parada Grandi di Oranjestad.
Ta corda tur hende cu despues di e parada di carnaval lo tin control di Polis riba bebemento tras di stuur, pues percura pa e chauffeur di bo grupo no bebe alcohol y asina evita detencion y multa.
