Awe 9 di februari MEP ta conmemora su 48 aña di existencia:

Tabata riba dia 9 di februari 1971 cu nos lider inmortal Gilberto François (Betico) Croes a funda e prestigioso partido MEP y cual partido a lanta pa lucha pa mas autonomia pa e isla aki.

Desde principio MEP a pone su dilanti e ideologia social-democrata, nos structura estatal y un union di henter e pueblo Arubano, sin distincion di rasa, color, religion, etc. Algo historico tabata cu den apenas dos luna di su fundacion MEP a logra obtene un tercera parti di e electorado Arubano, esta 7 asiento for di 21. Desde e tempo ey MEP a crece, tanto den voto como den asiento y ta e unico partido na Aruba cu desde su existencia nunca a yega di baha bao di 7 asiento. Esey ta demostra e forza di e nucleo fiel cu semper a sostene nos partido, tanto den tempo bon como tempo menos bon.

Durante su 48 añanan di existencia, MEP a participa na 18 eleccion, tanto pa Eilandsraad, Staten di Antiyas y Parlamento di Aruba y den 9 di e 18 eleccionnan aki MEP a haya e mayoria absoluto. Algo impresionante y historico den Reino Hulandes!

MEP ta un partido cu desde su fundacion te cu awor apenas a conoce tres lider, esta Betico Croes den feliz memoria, sr. Nelson Oduber y nos actual lider sra. Evelyn Wever-Croes.

Lucha pa Status Aparte

Sin duda algun cu MEP tabata e vehiculo principal di nos Libertador Betico Croes den su lucha pa nos Status Aparte. Pa por a cumpli cu e deseo di pueblo pa su libertad, nos Libertador mester a haci hopi sacrificio, drama sanger, sodor y lagrima pa realisa e anhelo aki. Alavez MEP ta e partido cu a percura pa nos simbolonan di union y libertad, esta himno y bandera, nos moneda, nos ortografia, nos propio constitucion, Gobierno, Parlamento, nos propio Gobernador, Banco Central etc. Den henter e lucha pa Status Aparte a resalta e accionnan di augustus scur 1977, ya cu tabata danki na e accionnan aki cu Aruba a wordo scucha door di Hulanda. Finalmente e deseo di Aruba a wordo concretisa durante e Conferencia di Mesa Rondo na maart 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda.

Y ta cu honor dia 13 di juli 1990 sr. Nelson Oduber a percura pa scrap e fecha di Independencia 1996 for di den Statuut pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.

Logro y proyectonan di MEP

Hecho ta cu ta danki na e Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki. Un gran cantidad di logro y proyecto a ser realisa durante cu MEP tabata den gobierno. Algun di e proyectonan cu a wordo realisa door di MEP tabata: Waf di container, Plan Sasaki pa desaroya henter e area turistico, edificionan di Domeinbeheer, Aduana, Ontvanger, SVB, Biblioteca Nacional, FCCA, DOW/DIP/Kadaster, ATA, SIAD, companianan estatal Arubus N.V., APA N.V., WEB N.V., Elmar N.V., Setar N.V., Lotto pa Deporte, oficinanan auxiliar di gobierno, construccion di stadionnan deportivo, casnan di pueblo, centronan di bario, planta di purificacion di awa,  wardanan di polis nobo, Sporthal, Centro Medico San Nicolas, construccion di careteranan, construccion y renobacion di schoolnan y mucho mas pa menciona.

Un otro logro importante tabata e reapertura di e refineria cu Coastal na 1991. Tambe e firmamento di un acuerdo cu ‘SACE’, unda a trece un solucion den e problema di garantianan: un debe di 206 miyon dollar a ser reduci te na 110 miyon dollar. E acuerdo cu Hulanda na unda 250 miyon florin di Plant N.V. a pasa pa Aruba ta un logro historico den cual ta demostra un biaha mas cu MEP semper a goberna cu curashi, perseverancia y determinacion.

Un partido sincero y honesto

Locual cu ta resalta durante henter e trayectoria impresionante di MEP ta e sinceridad y honestidad cu e partido aki ta desplega den e comunidad Arubano. MEP ta e unico partido cu na varios ocasion a bisa e pueblo adelanta con e situacion financiero y economico ta y si tin cu tuma pasonan necesario pa trece solucion, MEP semper ta haci esaki pa bienestar y futuro di nos criaturanan, sin importa cu esaki lo por costa partido voto den eleccion.

Finalmente MEP a percura tambe pa Aruba haya su prome Minister Presidente femenino den persona di sra. Evelyn Wever-Croes, kende a demostra di ta sali semper na vanguardia di esnan mas vulnerabel den comunidad.

Un gradicimento ta bay awe na tur esnan cu a yega di forma parti di e lista aki, tur e candidato, directivanan di e urnanan electoral, Forza Femenina Grace, e hala hubenil HOT, militantenan y tur e votadornan pa cu e 48 aña di existencia di nos partido. Mientras MEP ta existi, Aruba ta salba!