Manera cu ya nos a anuncia caba, diadomingo tabata un dia cu Papa Dios a habri shelo y laga awa basha riba nos pais, cual echo naturalmente ta un bendicion p’e agricultornan y nan cosecha.
Sinembargo pa esunnan cu ta circula riba nos pais, e tabata basta dificil, pasobra e esaki a haci cu e visibilidad riba caminda tabata basta limita.
Esey ta loke a sosode tambe a pasa den e zona hotelero, en particular na altura di ambos Riu Hotel, unda cu ya caba normalmente sa tin e problema di awa di riolering. Pero awo cu awa a cay, a haci e ruta practicamente impasabel pa peaton y automobilista.
Nos reportero n’e sitio por a nota cu tabatin varios auto cu mester a kita bay ful na man robes, p’asina yega nan destino y pa loke t’e trafico cu ta bin di nort, tambe mester kita completo, p’asina evita accidente.
For di e reportahe grafico cu por mira, e awa a cubri full e caminda cu bo no por mira e asfalt mas y e pasada naturalmente tabata imposibel.
Si nos mira pronostico di tempo, lo bay tin awasero pero modera, pero loke si lo resalta ta e biento fuerte p’e temporada di cuaresma aki.
