Awe nochi pa mas of menos 8:30 pm, usuarionan a constata cu hopi awa sushi di Bubali Plas tabata bayendo rumbo pa lama. E cantidad di awa tabata abnormalmente hopi, mescos cu e holo stinki cu a domina henter e area. Turistanan den vecindario mesora a cuminsa keha, indicando cu esaki nan no tabata sa di dje ora cu a book nan vakantie den hotel.
Restaurantnan cerca di Eagle Beach a sigura cu diariamente nan ta haya nan mes cu e reto aki, esta un holo insoportabel. Huespednan sa lanta bay y nenga di paga of cancela nan cena pasobra asina hende no por come. Hotelnan den vecindario di e planta di purificacion ta haya nan mes cu e mesun reto aki constantemente. Huespednan ta keha y mesora ta pidi pa descuento of pa cambia di hotel. Esaki ta traduci den perdida di entrada, sin cu e hotel of restaurant tin algo di haber of tin culpa di e mal trabou di DOW.
Awe nochi a nota cu e rooi cu ta core di Bubali Plas pa lama, tabata completamente yen di awa sushi. E nivel di awa tabata masha halto mes y ta nota cu ora e awa sushi drenta lama, cu e ta fomenta hopi scuma.
Aunke cu esaki kisas ta un practica normal, e hecho cu awo e ta hala atencion ta debi na un rapport devastado cu a sali riba e practica aki. A constata cu e awa ta contamina, ta contamina e awa di lama, ta causa daño na coralnan, sin lubida e bida marino completo. Den e rapport a sali awo cu di mil hende cu landa den lama eybanda, algo mas cu 30 ta bira malo. Ta sospecha cu esaki tin di haber cu e bacteria cu ta sali di e awa sushi di Bubali Plas.
E discusion a drenta arena politico y por lo menos dos fraccion a pidi pa un reunion publico. Ta pidi pa gobierno, representa pa minister di naturalesa, Ursell Arends y minister di infrastructura Evelyn Wever-Croes, mester ta presente den e reunion. Nan lo tin cu duna cuenta di e maneho, e situacion actual, kico nan ta haciendo y con lo soluciona e problema aki.
No mas cu e siman aki gobierno a anuncia cu den presupuesto 2022, a presupuesta 16 miyon florin pa drecha e problema. Gobierno ta bisa cu pa cumpra un planta nobo y moderno ta costa 60 miyon florin, locual no tin awo disponibel. Ta sinti cu for di parlamento ta biba e deseo pa forsa gobierno pa toch inverti e suma ey y kita 44 miyon di otro caminda pa toch por yega na un planta moderno, grandi, eficiente y profesional.
Loading…
Reload document 
Open in new tab Un di e discusion ta e rol cu hotelnan, cu ta percura pa gran parti di e awa sushi aki cu ta yega den e planta, pa explora kico nan lo por aporta. Ta sinti cu mester cobra pa maneho di awa preto na Aruba pasobra ta traha mas hotel, ta traha mas desaroyo di cas, pero ningun hende ta pensa unda e awa di pos ta termina na final. Mas nos keda man crusa, mas e problema ta crece y bay fo’i man.
Un rato despues di a informa di e awa sushi saliendo di Bubali Plas pa lama, DOW a manda un trahado pa cera e sluis bek. A nota cu ta haci esey manualmente na e sitio mes, cu ta impedi pa mas awa sali bay lama.
