Manera ya anticipa pa DOW, e rotonde di Noord, na altura di misa Santa Anna, lo a habri diaranson mainta, esta awe. Pero esaki no a bay keto.
Mainta tempran tabata tin un palo di awasero cu a haci cu e rotonde aki a keda completamente inundia pa awa, cu a haci cu e trafico cu a transita e momentonan ey, a keda practicamente pega.
E bieunan ta bisa cu awasero ta bendicion, pero esaki mas bien a traha riba e punta di nervio di hopi hende, en particular esnan cu mester a coy e ruta pa bay traha den e area hotelero.
E rotonde aki supuestamente mester a habri prome cu e fecha aki, pero segun DOW, despues cu e duiker a cay durante construccion, mester a prolonga e habrimento di e rotonde pa por a drecha e duiker completo.
Awo kico a bay fout aki? Calculacion di e duiker a bay fout cu e awa ta keda para un pool cu autonan mester pasa den dje? Of e contratista a mete la pata atrobe? Ta preguntanan cu sigur cu tin mester di nan contesta. Mientras tanto DOW mester busca un solucion pa e problema aki.
